یوناما «له ستراتېژيو تر تطبیقه: د فساد پر وړاندې د افغانستان مبارزې» تر نوم لاندې تازه ریپوټ کې د افغان دولت له درېیو قواو سره د مدني ټولنو او خپلواکو بنسټونو همکاري څېړلې ده.
د دغه ریپوټ د موندنو پر اساس له تاوتریخجنو نښتو وروسته، اداري فساد افغانستان کې له سترو ننګونو شمېرل کېږي.
د افغانستان لهپاره د ملګروملتونو سازمان ځانګړی استازی تدامیچي یاماموتو وايي، سره له دې چې حکومتي چارواکیو د دغه راپور د شمېرو او نظریو په چمتوکولو کې فعاله ونډه اخیستې چې د حقوقو او پالیسیو اصلاحات رامنځ ته شوي، خو فساد لا هم افغانستان کې د سولې او هوساینې ټینګښت په لار کې اساسي خنډ دی.
له دې سره ـ سره یوناما له اداري فساد سره د مبارزې لهپاره د افغان حکومت له یوشمېر اقدامونو هرکلی کړیدی.
د افغانستان لهپاره د ملګروملتونو سازمان ځانګړي استازي ویلي، افغان حکومت د ۲۰۱۷ کال ډسامبر میاشت کې له اداري فساد سره د مبارزې په موخه یوه کړنلاره طرح او تصویب کړه چې یوه مناسبه او وړ طرحه ده.
د ښاغلي یاماموتو په وینا، افغان حکومت تېر میلادي کال کې د جزايي کد نوي قانون نافذ کړی چې د اداري فساد پر وړاندې د ملګرو ملتونو له کنوانیسیون سره په مطابقت کې د اداري فساد ټول اجباري جرایم په کې ذکر شويدي.
د یوناما راپور په اساس، افغانستان له اداري فساد سره د مبارزې په چارو کې پرمختګونه درلودلي او د دغې تازه کړنلارې چمتو کول افغانستان سره د قوانینو په اصلاحاتو او له فساد سره د مبارزې بهیر په اصلاح کولو کې مرسته کوي.
