د حکومت اجرایوي رییس ډاکټر عبدالله عبدالله وايي، چې په ټاکنیزو نظام کې له سمون راوستلو پرته نه باید ټاکنې وشي او د ټاکنو په بنسټ کې د سمون راوستلو چارې له ولسمشر سره په همغږې په رسمي ډول سر له سبا شروع کېږي.
عبدالله نن (دوشنبه) د وزیرانو شورا په غونډه کې وویل، په ټاکنیز نظام کې د سمون ځنډ له نظام څخه د ځېنو سیاستوالو د څنګ ته کېدو لامل شوی دی.
د اجرایوي رییس په خبره، هغه ژمنه چې حکومت د ټاکنیز بنسټ د سمون په برخه کې له ولس سره کړې وه، د روان کال د بروکسل کنفرانس له پیل مخکې به یې عملي کړي.
په ورته وخت کې د ولسي جرګې دویم مرستیال نعمت الله غفاري سلام وطندار ته وويل، په ټاکنیز نظام کې د سمون راوستلو چارې د ټاکنیزو کمېسیونونو د واکونو، دندو او تشکیل په اړه ولسمشر په تقنیني فرمان پورې تړلي، چې د ملي شورا له خوا باید د تایید رایه واخلي.
غفاري په ټینګار سره وايي، چې د ولسمشر تقنیني فرمان له تصویب مخکې هر ډول سمون به د اساسي قانونو خلاف کار وي.
ولسي جرګې په ټاکنیز نظام کې د سمون راوستلو په اړه د ولسمشر تقنیني فرمان د رایو په اکثریت رد کړ، خو د مشرانو جرګې بیا د تعدیلاتو په راوستلو تایید کړ.
په پام کې ده، چې د ملي شورا د دواړو جرګو له غړیو د تقنیني فرمان د تایید له پاره يو ګډ کمېسیون جوړ شي.
