افغان سولې لپاره د امریکا د بهرنيو چارو وزارت ځانګړی استازی زلمی خلیلزاد د ولسمشر غني پر لومړي مرستیال امرالله صالح د موټرو پر کاروان د برید په غبرګون کې وايي، د سولې خبرو له رانږدې کېدو سره ورانکارو ډلو د دغه تاریخي فرصت ګډوډولو هڅې زیاتې کړي او ډېر خفه کېږي.
خلیلزاد نن پر خپله ټوېټر پاڼه ليکلي چې پر امرالله صالح برید د ورانکارۍ هڅو وروستۍ بېلګه ده او برید کې یې د وژل شوو کسانو پر مرګژوبلې خواشیني څرګنده کړې ده.
د ولسمشر د لومړي مرستیال د موټرو پر کاروان تېره ورځ د کابل څلورمه امنیتي حوزه کې د سړک غاړې بم چاودنه وشوه چې ۱۰ کسان په کې وژل شوي او تر ۳۹ زیات ټپیان دي چې امرالله صالح دغه برید کې برسېرن ټپي شوی دی.
ولسمشر محمد اشرف غني د دې برید غندلو سره د پېښې د پلټنې غوښتنه کړې ده.
د طالبانو ویاند ذبیح الله مجاهد ویلي، دوی دغه برید کې لاس نه لري.
