د اجرایه ریاست د ویاند مرستیال جاوید فیصل وايي، چې د برېښنايي تذکرو د ادارې مامورین له دندو ګوښه شوي نه دي، یواځې یې دندې ځنډول شوي دي.
تېره اۍونې د وزیرانو شورا په ناسته کې عبدالله عبدالله وویل، چې تر راتلونکو دوو اونیو پورې به هرومرو د یادو کسانو د ګوښه کېدلو لامل څرګند شي.
د اجرایه ریاست د ویاند مرستیال سلام وطندار سره په خبرو کې زیاته کړه، چې د اجرایه ریاست څېړنو وښودله، چې د یادو مامورینو د دندو ځنډېدل د نړیوالو مرستیو د پرېکېدو پورې تړاو لري.
همداراز نوموړي وویل، په دندو کې ځنډ به د برېښنايي تذکرو د ویش تر پیل پورې دوام وکړي.
فیصل زیاته کړه، چې دوی دغه څېړنه له یادې ادارې سره شریکه کړې ده او هیله یې څرګنده کړه، چې د برېښنايي تذکرو د ویش له پيلېدو سره سم به یاد کسان بیا ځلي جذب شي.
۳ اونې وړاندې د برېښنا يي تذکرو د ویش ادارې ۸۰۰ مامورین له دندو و باسل.
د برېښنايي تذکرو د ویش ادارې رییس زمري باهر سلام وطندار ته د یادو کسانو د دندو ځنډېدلو لامل له یادې ادارې سره د نړیوالو مرستو غوڅېدل بولي.
په ورته وخت کې د یادې ادارې ګوښه شوي مامورینو سلام وطندار ته د نوم نه اخیستلو په شرط وویل، د روان میلادي کال د جولای میاشتې تر ۱۵ مه ورته د کار کولو فرصت ورکول شوی او له دغه تاریخ نه وروسته یې برخلیک ناڅرګند دی.
څه وخت وړاندې د برېښنايي تذکرو د وېش ادارې مالي ملاتړو بنسټونو خبرداری ورکړی و، که چېرې د برېښنايي تذکرو د ویش لړۍ پیل نه شي دوی به خپلې مرستې پرې کړي.
دوې اوونۍ وړاندې ولسمشرغنې د یادې ادارې رییس سره په لېدو کې یادې ادارې ته هدایت وکړی، چې تر راتلونکې یوې اونې پورې د برېښنايي تذکرو د وېش ازمایښتې طرحه جوړه کړي او باید د ۹۰ ورځو له پاره له کابل څخه د ویش لړۍ پېل شي.
