افغانستان مهاجرلری مینیلگن موتر ایران پولیسی آرقه‌لی اوق آستیده آلینیب و اوت بیریلیشی ملی و خلق‌ارا عکس‌العمل‌لرگه روپه‌رو بولگن. حاضر مذکور عکس‌العمل‌لر و اعتراض‌لرنینگ دوامی اروپالیک مملکت‌لرگه ییتیشگن.
اوتگن کون اتریش یشاوچی‌لری و افغانستان‌لیک مهاجرلردن اونلرچه‌سی مذکور مملکت پایتختی ویانا ده توپله‌نیب، افغانستان‌لیک مهاجرلر مینیلگن موتر ایران پولیسی آرقه‌لی اوت بیریلیشی نی قاره‌لشگن.
اولر افغانستان حکومتی نی توجه‌سیزلیک عیب‌لب و انسانی حقلر تشکیلات‌لریدن مذکور حادثه تیکشیریلیب و اونینگ عامل‌لری جزالنتیریلیشی نی سوره‌شگن.
اعتراضچی‌لردن بیری نینگ سلام‌وطندارگه ایتیشیچه، افغانستان یشاوچی‌لری یالغیز ایران ده ایمس بلکیم اروپالیک مملکت‌لرده هم یمان مناسبت‌لر بیلن روپه‌رو بوله‌دی.
مذکور ناراضلیک نمایش‌ده افغانستان‌لیک‌لرنی همراه‌لیک قیله‌دیگن اتریش یشاوچی‌لریدن بیری نینگ سلام‌وطندارگه ایتیشیچه: «مین بوگون وطنداش‌لری نینگ قانی‌دن دادخواهلیک قیله‌دیگن کیشیلرنینگ آره‌سیده‌من، افغانستان یشاوچی‌لریگه قرشی ظلم‌لر رسانه‌لردن اونچه‌لیک نشر بولمه‌یدی و بیزلر عدالت تأمین‌لنیشی و بونده‌ی واقعه‌لر آلدینی آلینیشی اوچون سیس چیقاره‌میز.»
مذکور ناراضلیک نمایش نی ترتیب بیرگن‌لردن بیری نینگ ایتیشیچه، بو ناراضلیک نمایش نی یولگه قویگندن کیین افغانستان حکومتی تامانیدن اولر بیلن تماس آلینگن و اولرنینگ هیچ بیر نرسه‌دن خبری یوق ایکن. اونگه کوره، اولر حاضرگچه 15 اروپالیک مملکت‌لرده افغانستان‌لیکلرنینگ حقیده بولگن ظلم توغریسیده سیس چیقاریش اوچون ناراضلیک نمایش نی ترتیب بیرگنلر.
اولر خلق‌ارا تشکیلاتی اینیقسه بیرلشگن ملتلر تشکیلاتی و انسانی حقلرنی کوزه‌تووچی اداره‌سیدن سونگی واقعه‌لر تیکشیریلیشی نی سوره‌شگن.
افغانستان مهاجرلری مینیلگن موتر ایران پولیسی آرقه‌لی اوت بیریلگنیدن کیین، افغانستان حکومتی مذکور حادثه تیکشیریلیشی و ایران رسمی‌لری بیلن صحبت اوتکزیش اوچون بیر هیأت تعیین قیلدی.
بو حادثه نی تیکشیریش اوچون ایران نینگ یزد شهری گه سفر قیلگن تهران بوییچه کابل ایلچیسی عبدالغفور لیوال نینگ ایتیشیچه، ایران رسمی‌لری افغانستان‌لیک مهاجرلر مینیلگن موتر اوستیگه اوق آتیش نی تن آلگن. اونگه کوره، مذکور حادثه‌ده 3 افغانستان اهالیسی هلاک و باشقه 5 کیشی ایسه یره‌لنگن.
