کابل‌ده خبری بیر ییغین اوتکزگن مخابراتی خذمتلرنی کوزه‌تووچی اداره یا-ده اترا مسؤوللری‌نینگ ایتیشیچه، افغانستانده مخابراتی ترماقلرنینگ مسؤوللریدن کیله‌جک هفته گچه نیچه بولیم‌دن باشقه بوتون قوشیمچه خذمت‌لر نظارت قیلینیشی سوره‌لگن.
اوتگن هفته اجتماعی ترماقلرنینگ فایده‌لنووچی‌لریدن قطاری، مخابراتی شبکه‌لر مشتری‌لریدن اوغیرلشی توغریسیده «اترا قییرده؟» نامی آستیده کمپاین یولگه قویگنیدن کیین اوشبو ییغین یولگه قوییلدی.
مخابراتی خذمتلرنی کوزه‌تووچی اداره باشلیغی محمدنجیب عزیزی‌نینگ ایتیشیچه، اشتراکچی‌لرنینگ پولی ضایع بولمس‌لیگی اوچون بوندن کیین مخابراتی شرکت‌لردن هیچ بیریسی وقتی یکونلنگن بسته‌لرنینگ مشتری‌لرنی رضایتی نی آلمسدن قیته‌دن و اتومات شکلده فعال قیلیش گه رخصتی یوق.
عزیزی‌نینگ ایتیشیچه، بوندن کیین مخابراتی شرکتلر مشتری‌لری‌نینگ انترنیت‌دن فایده‌لنیش اوچون پولی نی اتومات شکلده آلیش گه حقلی ایمس دیر.
اترا مسئولری‌نینگ آگاه‌لنتیریشیچه، بو توغریده بی فرق یاندشگن مخابراتی شرکتلر جریمه بوله‌دی.
مخابراتی خذمتلرنی کوزه‌تووچی اداره باشلیغی، انترنیتی خذمتلرنی صفت‌سیزلیگی توغریسیده ایتیشیچه، برچه انترنیتی و مخابراتی شرکتلر جواز شرطی و بو توغریده بولگن شرطنامه اساسیده، خذمت ترقه‌تیشی کیره‌ک.
اترا اداره‌سی مسئولری مخابراتی شرکت‌لردن مشتری‌لرگه بیر بسته نی فعال ایتیش یولی نی ارایه ایتگن بیر چاغده اونینگ غیر فعال ایتیش یولی نی هم آچیقله‌شی نی سوره‌گن.
عین حالده، اوشبو اداره مسئولری مخابراتی شبکه‌لر مشتری‌لری‌نینگ بی پول خذمتلری حقیده ایتیشیچه، بو بولیم گه یالغیز 7 قونغیراق بی پول دیر و اوندن کوپ بولگن صورتده، هر بیر قونغیراق بیر افغانی خرجت کوتاره‌دی.
مخابراتی خذمتلرنی کوزه‌تووچی اداره باشلیغی‌نینگ ایتیشیچه، «اترا قییرده؟» کمپاینی‌ده مخابراتی شبکه‌لر مشتری‌لری تامانیدن ارایه ایتیلگن شکایت‌لرگه اساسی ییچیم یول تاپیش اوچون مذکور شکایتلر ینه بیر مرته فنی شکلده تیکشیریله‌دی.
