غزنی ولایتی‌نینگ اوزاق قیشلاق‌لریدن شهرگه کیلگن کیشی، شاشیلیب و خواطرله‌نیب خصوصی کسلخانه‌لردن بیری‌ده بلند و پست‌گه باره‌دی و تورموش اورتاغی‌نینگ ایکینچی جراحی عملی اوچون پول قیدیره‌دی. بو کیشی غزنی‌نینگ ناتانیش شهریده برچه ایشیک‌لرنی یوزیگه یاپیق کوره‌دی، بیر کون آلدین دنیاگه کیلگن اینگ کیچیک فرزندی‌نی ساته‌دی و کسلخانه‌ده اولیم بیلن کوره‌شیب تورگن تومورش اورتاغی‌نینگ قوتقریش اوچون حرکت قیله‌دی.
آتی و یشش ییری گزارش‌گه کیریتیلیشی‌نی ایستمه‌گن بو کیشی‌دن سوره‌دیم؟ بیران کیشی بو چقه‌لاق‌نینگ آلیش‌نی ایسته‌یدی می؟ کوزی یاش‌گه تولیب و یوره‌گیدن اوکسوندی، تماغی توتیلیب، «اوتگن کون چقه‌لاق قیزیم‌نی فرزندلیک‌که بیردیم دیدی و حاضر بیر کیشی ایکینچی‌سینی فرزندلیک‌که آلیش‌نی ایسته‌یدی».
اوشبو کیشی‌نینگ ایتیشیچه، چقه‌لاق‌لرنینگ آنه‌سی بولرنی اَسره آلمه‌یدی و حاضر کسلخانه‌ده یاتگن. اونینگ کوپه‌یتیریشیچه، تورموش اورتاغی، طبیعی حالت‌ده توغه آلمه‌گنی باعث، داکترلر جراح‌لیک بولیشی‌گه قرار قیلگن، ایکیز فرزندلری دنیاگه کیلیشی‌دن آلدین، چقه‌لاق قیزی‌نینگ بیر عایله‌گه 40 مینگ افغانی ساتیب آنه‌سی‌نینگ داروسی و جراح‌لیک عملی‌گه صرفله‌گن.
بو کیشی‌نینگ ایتیشیچه، اوغیل بولگن ایکینچی چقه‌لاق‌نی ساتیب و ایکیزلرنینگ آنه‌سینی ایکینچی جراح‌لیک عملی خرجتی‌نی قولگه کیریتیش‌نی ایسته‌یدی. بیراق شونده هم ایکینچی جراح‌لیک عمل خرجتی تولمس‌لیگی‌دن خواطر بیلدیره‌دی. چونکه داکترلر، بو جراح‌لیک عمل‌گه 50 مینگ افغانی پول کیره‌ک دیگن‌لر.
اوندن سوره‌دیم، نیمه اوچون دولتی کسلخانه‌گه بارمه‌دینگیز؟ راحت‌سیزلیک بیلن ایتدی، او ییرده کسلی‌گه قره‌مه‌گن و داکترلر، کسل‌نی کابل آلیب باریشینی ایسته‌گن.
باشقه آلتی فرزندی بولگن اوشبو چقه‌لاق‌لر آته‌سی‌نینگ ایتیشیچه، اقتصادی قیین‌چیلیک‌که روپه‌ره و قولی‌ده‌گی بار پولی یکونلنگن. اوشبو کیشی دولت و باشقه خیریه اداره‌لردن تورموش اورتاغی‌نینگ دارولش اوچون یاردم سوره‌یدی.
بیراق، باله‌لر بولیمی‌ده انسان حقلری کمیسیونی‌نینگ نماینده‌سی عبدالله عابد، باله‌لر ساتیلیشی‌نی جرم دیب ایتیشیچه، بو ایش افغانستان قانون‌لری و انسان حقلری ارزشی‌گه قرشی دیر و عامل‌لری تیرگاوگه آلینیشی کیره‌ک. جناب عابد، حکومت‌دن بو عایله‌گه یاردم بیریشینی سوره‌دی.
عین حالده، غزنی دولتی کسلخانه باشلیغی بازمحمد همت‌نینگ ایتیشیچه، اوشبو کسلخانه‌ده باله دنیاگه کیلتیریش و جراح‌لیک عمل اوچون برچه امکانیت یره‌تیلگن و غزنی‌ده علاجی بولمه‌گن کسل‌لر، رسمی شکلده آمبولانس‌لر آرقه‌لی کابل‌گه ییتکیزیله‌دی.
