تینچلیک عالی کینگشی مسؤوللری نینگ ایتیشیچه، اولرنینگ معلوماتی اساسیده، جاری هفته پنجشنبه کونی قطرده آمریکا و طالبان نماینده‌لری آره‌سیده تینچلیک سوزلشوولری قیته‌دن باشلنه‌دی.
سلام‌وطندارگه صحبت بیرگن تینچلیک عالی کینگشی سوزلاوچیسی اسدالله زایری نینگ ایتیشیچه، اوتگن کون مذکور کینگش باشلیغی عبدالکریم خلیلی، افغانستان تینچلیک لایحه‌سی بوییچه آمریکانینگ خاص نماینده‌سی زلمی خلیلزاد بیلن اوچره‌شگن و اولر تینچلیک جریانی قنده‌ی بولیشی خصوصیده بحث اوتکزگن.
کریم خلیلی و زلمی خلیلزادنینگ اوچره‌شوویده ایتیلیشیچه، تینچلیک جریانیده وجودگه کیلگن فرصت دن توغری شکلده فایده‌لنیش کیره‌ک و تینچلیک برنامه‌لری هم مصلحت بیلن عمل گه آشیریلیشی لازم.
جناب زایری گه کوره، اولرنینگ معلوماتی اساسیده، زلمی خلیلزاد کیله‌سی ایکی کون و بیرینچی اگست ده ینه بیر بار قطرده طالبان نینگ نماینده‌لری بیلن اوچره‌شه‌دی.
تینچلیک عالی کینگشی سوزلاوچیسی نینگ کوپه‌یتیریشیچه، افغانستان، پاکستان و اندونیزیانینگ دین عالم‌لری آره‌سیده اگست آیی نینگ آخری اندونیزیا مملکتی ده اوچ تامانلمه ییغین اوتکزیلیشی خصوصیده قرار قیلیگن و اولر بو توغریده ییترلیچه تیارگرلیک آلگن.
اونگه کوره، پاکستان باش وزیری عمران خان هم افغانستان تینچلیک جریانی خصوصیده کابل گه سفر قیلیشی ممکن، بیراق بو سفرنی دقیق زمانی حاضرگچه معلوم بولمه‌گن.
