قطرده طالبان گروهی نینگ سیاسی دفتری سوزلاوچیسی سهیل شاهین نینگ میدیالرگه ایتیشیچه، قطر باشکینتی دوحه ده طالبان گروهی نینگ نماینده‌لری و افغانستان تینچلیک لایحه‌سی بوییچه آمریکا تشقی ایشلر وزیرلیگی‌نی خاص نماینده‌سی زلمی خلیلزادنینگ آره‌سیده تینچلیک سوزلشوولری قیته‌دن رسمی شکلده باشلنگن.
سهیل شاهین گه کوره، سوزلشوولرنی بو دوری ده حقانی ترماغی نینگ ایکینچی آدمی انس حقانی هم اشتراک قیلگن.
قطرده طالبان گروهی نینگ سیاسی دفتری سوزلاوچیسی سهیل شاهین نینگ اوز توییتر صحیفه‌سیده یازیشیچه، آمریکا و طالبان آره‌سیده‌گی سوزلشوولر توخته‌گن جاییدن باشلنگن و ایرته هم دوام ایتیشی ممکن.
آمریکالیک بیر منبع نینگ تصدیق قیلیشیچه، آمریکا و طالبان آره‌سیده‌گی تینچلیک سوزلشوولری قطر باشکینتی دوحه ده قیته دن باشلنگن.
مذکور منبع گه کوره، بو ییغینده بحث گه آلینه‌دیگن اساسی موضوعلر زوروانلیک‌لر کمه‌ییشی، آتیش‌کیسین اعلان قیلینیشی و افغانستانلیک‌لر ارا تینچلیک سوزلشوولری باشله‌نیشی دیر.
طالبان گروهی نینگ سابق اعضاسی سیداکبر آغانینگ ایتیشیچه، سوزلشوولرنی بو دوری ده ایلگری تیارلنگن مسوده اوستیگه کیلیشیلیشی ممکن.
اونگه کوره، آمریکا و طالبان آره‌سیده تینچلیک کیلیشووی امضاءلنگنیدن سونگ، افغانستانلیک‌لر ارا سوزلشوولر باشلنه‌دی.
بیراق، تینچلیک ایشلری بوییچه دولت وزیرلیگی نینگ استراتیژیکی علاقه عمومی باشلیغی ناجیه انوری، آمریکا و طالبان آره‌سیده سوزلشوولر باشلنگنینی تصدیقلب سلام‌وطندارگه ایتیشیچه، آمریکا جمهور رئیسی دونالد ترامپ، جمهور رئیس غنی بیلن اوچره‌شگنده، آمریکا بیلن طالبان نینگ ایلگری مسوده سینی بیکار قیلگن.
آمریکا و طالبان آره‌سیده سوزلشوولر قیته‌دن باشلنگن بیرچاغده، انسان حقوقی ایرکین کمیسیونی، بو سوزلشوولرده بحث گه آلینه‌دیگن موضوعلر انسان حقوقی کمیسیونی بیلن شریک قیلینمه‌گنیدن خواطر بیلدیرگن.
افغانستان بوییچه انسان حقوقی ایرکین کمیسیون باشلیغی شهرزاد اکبرنینگ ایتیشیچه، آتیش‌کیسین برقرار ایتیلیب و افغانستانلیک‌لر سوزلشوولر باشلنگنیدن سونگ، بو لایحه‌نی تینچلیک سوزلشوولری دیب بوله‌دی.
آمریکا جمهور رئیسی دونالد ترامپ، جاری میلادی ییل، سپتمبر آیی، کابل‌ده آمریکالیک بیر عسکر هلاک ایتیلگنیدن سونگ، طالبان بیلن بولگن تینچلیک سوزلشوولرینی اولیک اعلان قیلگن ایدی.
