افغانستان نینگ تورکمنستان بیلن چیگرهداش آقینه بندرگاهیده افغانستاننی مرکزی آسیا همده اروپا بازارلریگه باغله یدیگن تیمیر یولنی قوریش ایشی باشله تیلدی. مذکور لایحه نینگ آچیلیش ییغینیده قتنشگن افغانستان نینگ فواید عامه وزیری انجنیر محمود بلیغ "لاجورد یولی" دیب ناملنه دیگن مذکور تیمیر یول ترماغینی افغانستان ترانزیتی و سودا علاقهلری رواجی اوچون کته اهمیتگه ایگه دیدی:
"بیزنینگ اساسی مقصدی میز بیرینچی شمالده جایلشگن حیرتان، شیرخان، آقینه و تورغندی کبی بندرگاهلری میزنی تیمیر یولی ترماغی آرقلی مرکزی آسیا مملکتلری بیلن باغلش. اوشبو تیمیر ترماغی قوریب بیتکزیلیشی بیلن ترانزیت ساحهسیدهگی معمالریمیز انچه یینگیللشهدی." دیدی جناب بلیغ.
یقینده قوشنی تورکمنستان تیمیر یولی ترماغی افغانستان نینگ شمالی فاریاب ولایتی نینگ آقینه بندرگاهی گچه قوریب بیتکزیلدی. رسمی عشق آبادنی آقینه بندرگاهیدن اندخوی تومنی مرکزیگچه 35 کیلو متر مسافهده تیمیر یول قوریب بیریش بارهسیده وعده بیرگن. محلی رسمیلرکونی کیچه ترکمن مهندسلری آقینه بندرگاهیده تورکمنستان چیگره چیزیغیدن افغانستان حدودیده اوچ یریم کیلو متر مسافهده تیمیر یول قورگن لیکلرینی تاکیدلب، مذکور مهندسلرنی آقینه – اندخوی آره لیغیده تیمیر یول قوریش ایشینی توختاوسیز روشده دوام ایتدیریشلرینی بیلدیر دیلر. افغانستان نینگ فواید عامه وزیری محمود بلیغ اوشبو لایحه نینگ خرجتی آسیا ترقیات بانکی تامانیدن تولهنیلهدی دیدی.
افغانستان جمهور رییسی نینگ مرکزی آسیا دولتلری و روسیه بوییچه مصلحتچیسی محمد شاکر کارگر آقینه – تورکمنستان تیمیر یولی ترماغی نینگ ستراتیژیک اهمیتی اوستیده توختهلیب، مذکور تیمیر یولنی افغانستاننی کسپین دینگیزی، آذربایجان، گرجستان، تورکیه همده قاره دینگیز آرقلی اروپا بازلری بیلن باغلهیدی دیگن.
رسمی کابل یقین کیلهجکده افغانستاننی تیمیر یول ترماقلری آرقلی اوز قوشنیلری بیلن باغلنیشیگه امیدوار. آقینه بندرگاهیدن باشلنه دیگن تیمیر یول شمالی ولایتلر جوزجان، بلخ و قندوز آرقلی تاجکستان تیمیر یولی ترماغی بیلن هم باغلنهدی.
افغانستان بوندن بیر نیچه ییل آلدین تیمیر یولی بولمهگن مملکت حسابلنردی. ایلک بار اوزبیکستان مهندسلری افغانستان نینگ حیرتان بندرگاهی بیلن بلخ ولایتی مرکزی مزار شریف شهری آرهلیغیده 75 کیلو متر مسافهده تیمیر یول قوریب بیرگن ایدیلر. آقینه بندر گاهی بیلن اندخوی تومنی مرکزی آرلیغیده تورکمنستان مهندسلری همکارلیگیده قوریله دیگن تیمیر یول مملکتده تیمیر یول قوریش اوچون عملگه آشیریله دیگن ایکینچی مهم لایحه سنهلهدی.
عین حالده آقینهدن باشلنه دیگن تیمیر یول ترماغی غرب تامانگه، فاریاب، بادغیس و هرات ولایتلری آرقلی ایرانگه همده تورغندی بندر گاهی آرقلی قیته ترکمنستان نینگ تیمیر یولی ترماغیگه هم باغلنهدی. افغانستان نینگ شمال ولی ولایتلریده جایلشگن بندرگاهلرنی مرکزی آسیا آرقلی اروپا، روسیه، چین بازارلری قاله بیرسه تورکیه بازارلریگه باغلنیشی بیرینچی جهتدن افغانستاننی پاکستان ترانزیتیگه بولگن احتیاجینی بیر مونچه برطرف ایتهدی. ایکینچیدن افغانستان تجارتی رونقی اوچون مهم رول اوینهیدی. شمال تیمیر یولی ترماغی قوریب بیتکزیلیشی در واقع مملکت اقتصادیگه ینگی جان بغیشلب، مینگلب کیشی افغانستانلیک ایشچیلر اوچون مملکت ایچکریسیده ایش اورینلرینی یره تیب بیرهدی.
حاضرگی کونده افغانستان دولتی و خلقینی مهم و کته آستقورمه لایحهلرینی عملگه آشیریش لیککه جدی احتیاجی بار. عکس حالده افغانستان اقتصادی رواجلنیشینی تصور ایتیش همده مملکت اهالیسی نینگ تورموش درجهسینی یخشیلش ممکن ایمس.
تیمیر یول ترماقلرینی قوریش بیرینچی درجهلی اهمیتگه ایگه بولگن آستقورمه لایحهلردن سنهلهدی. در واقع تیمیر ترماقلری قوریلیشی ایچکی و تشقی سرمایه دارلرنی مملکت ایچکریسیده سرمایه یاتقیزیشگه ترغیب ایتهدی.
باشقه تاماندن چیت ایل دولتلردن افغانستان آلیب کیلینه دیگن تجاری توارلر ارزان نرخده مملکت بازارلریگه ییتکزیلیب شونینگدیک افغانستاندن خارج گه آلیب باریله دیگن تجاری اشیالرنی آز وقت ایچیده کوزلنگن مقصدلرگه ییتکزیش اوچون قولهی شرایط مهیا ایتیلهدی.
افغانستان حکومتینی مملکت آستقورمه لایحهلرنی عملده تطبیق ایتیش اوچون خلق ارا بانکلر جملهدن آسیا ترقیات بانکی، دنیا بانکی، اسلامی بانک و باشقه دونر دولتلریاردم لرینی جلب ایتیش اوچون تشبث کورسهتیشی لازم.
حاضرگی کونده افغانستان خلقی نینگ بیرینچی احتیاجی اگر امنیت سنلسه، ایکینچی درجهلی اهمیتگه ایگه مساله مملکتده ایشسیزلیک بحرانینی برطرف ایتیش و میلیونلب کیشی ایشسیزلرنی مناسب ایش جایلری بیلن تامینلش مسالهسی حسابلنهدی. در واقع اساسی اهمیت گه ایگه بولگن آست قورمهلر لایحهلرینی عملده تطبیق ایتیش مملکت امنیتنی تامینلش مسالهسیگه هم کومک قیلهدی.
