بوگون "دوشنبه" کابلده خبری ییغین اوتکزگن برقرارلیک و یقینلیک سیلاو تیمی اعضاسی فضلاحمد معنوی نینگ ایتیشیچه، ساختهکارلیک آوازلرنی سیستمدن چیقاریلیشی اوچون سیلاو ایرکین کمیسیونی اوستیگه فشار کیلتیرهدیلر. جناب معنویگه کوره، ساختهکارلیک آوازلر هیچبیر زمان قبوللنمهیدی.
جناب معنوی نینگ آگاهلنتیریشیچه، سیلاو ایرکین کمیسیونینینگ قانونگه کوره حرکت قیلیشی کیرهک و آق آوازلریدن دفاع قیلیش اوچون هرقندهی گزینهلردن فایدهلنهدیلر.
برقرارلیک و یقینلیک سیلاو تیمینینگ اوشبو اعضاسیگه کوره، سیلاو ایرکین کمیسیونی ناقانونی حرکتلری بیلن مملکتنی بحران تامان آلیب بارمهسین و اعتراضچیلرنینگ طلبلریگه دقت قیلیشی کیرهک.
افغانستان بوییچه ایرکین و عدالتلی سیلاو بنیادی یا-ده فیفا تشکیلاتی نینگ سوزلاوچیسی سمیرا رسا نینگ سلاموطندارگه ایتیشیچه، حاضرگی وضعیتدن چیقیش اوچون سیلاو ایرکین کمیسونینینگ ینگی قرار آلیشی کیرهک.
خانم رسا گه کوره، سیلاو سلامتلیگی سوراق بیلن دوچ کیلگن و بو موضوع نظارت قیلیووچی نهادلرنینگ خواطرلنترگن دیر.
افغانستان بوییچه شفاف سیلاو بنیادی یا-ده تیفا تشکیلاتی نینگ بیر اعلامیه آرقهلی ایتیشیچه، سیلاو ایرکین کمیسیونینینگ اوتگن کوندهگی ییغینی سیلاو چیگللیگینی کوپهیتیرگن و کمیسیون اعتراضچیلرگه قناعتلی جواب بیرمهگن.
بیراق، سیلاو ایرکین کمیسیونی نینگ تاکید قیلیشیچه، اولرگه قرشی هیچقندهی فشار یوق و اوز ایشلرینی قانونگه کوره انجام بیرهدیلر.
ایتیلیشیچه، برقرارلیک و یقینلیک سیلاو تیمینینگ طرفدارلری بوگون "دوشنبه" نیمروز و قندوز ولایتلریده ناراضلیک قیلیشگنلر. اعتراضچیلرنینگ آگاهلنتیریشیچه، 300 مینگ ساختهکارلیک آواز بیکار قیلینمهگن صورتده، اعتراضلریگه دوام بیرهدیلر.
