ننگرهار محلی مسووللری نینگ ایتیشیچه، داعش اعضالریدن کمیده 700 تهسی امنیتی کوچلرگه تسلیم بولگن و اولردن کوپراغینی عیاللر و بالهلر تشکیل بیرهدی.
اولرنینگ ایتیشیچه، داعش اوشبو ولایتده شکست بیلن دوچ کیلگن و بوندن سونگ، قیینچیلیک ایجاد قیله آلمهیدی.
201 سیلاب قول اردو قومندانلیگی نینگ 4- لوا قومندانی محمدکریم نیازی نینگ سلاموطندارگه ایتیشیچه، تسلیم بولگنلردن بیرقطاری پنجابلیکلر و اوزبیکستانلیکلر دیر.
جناب نیازی گه کوره، ایکی هفتهدن بویان امنیتی کوچلر داعش گروهیگه قرشی عملیات یولگه قویگن و اوشبو عملیات نتیجهسیده بو گروهی کامل صورتده نابود ایتیلگن.
ننگرهار ولایتی بوییچه ملی خوفسیزلیک ریاستی باشلیغی نظرعلی واحدی نینگ ایتیشیچه، تسلیم بولگنلردن 50% نی پاکستانلیکلر تشکیل بیرهدی.
جمهور رئیس غنی اوتگن هفته ننگرهار ولایتیده سفر قیلیب داعش گروهی نینگ شکست بیلن دوچ کیلگنی باعث، اوشبو ولایت یشاوچیلری و امنیتی کوچلریدن منتدارلیک بیلدیرگن ایدی.
بیراق، طالبان گروهی نینگ ادعا قیلیشیچه، ننگرهار ولایتیده داعش گروهینی اولر شکست بیرگن. اوشبو گروه تامانیدن ترقهتیلگن خبرنامهده ایتیلیشیچه، چیتایللیک و دولتی کوچلر داعش گروهی نینگ کمیده 800 اعضاسینی قوتقرگن.
حکومتی مسووللری طالبان گروهی نینگ اوشبو ادعالرینی رد قیلیب داعش گروهی امنیتی کوچلر و اهالی تامانیدن نابود ایتیلگن دیدیلر.
