.jpg)
افغانستان بوییچه کانلر و پترولیم وزیرلیگیدن بیر منبع نینگ سلاموطندارگه ایتیشیچه، غضنفرگروپ نینگ ایستهگی بیلن حکومت افغانستان نینگ اوچ اونملی سوداگرلیک بندری ده غضنفرگروپ نینگ امکانیتلری و نفت تازهلاوچی ایشخانهلرینی تیکشیریش اوچون بیر هیأت تعیین قیلگن.
مذکور منبع دن نقل قیلینیشیچه، حکومت نینگ تیکشیروولری یکونلنگنیدن سونگ، غضنفرگروپ نینگ دولتی ییرلرده قوریلگن نفت تازهلاوچی ایشخانهلری ساتیب آلینهدی.
افغانستان حکومتی حیرتان، آقینه و شیرخان بندرلریده غضنفرگروپ نینگ نفت تازهلاوچی ایشخانهلری تیکشیریلشی اوچون صناعت و سوداگرلیک، کانلر و پترولیم، اقتصاد، مالیه وزیرلیکلری، یشش محیطنی سقلش ملی اداره و نورم و استندرد ملی ادارهلری نینگ نمایندهلریدن نفتی ماده ایشخانهسی نینگ اورین باسری نی ریاستی بیلن بیر هیأت تشکیل بیرگن.
سلاموطندار تامانیدن قولگه کیریتیلگن معلومات اساسیده، بو هیأت حاضرگچه حیرتان بندریده غضنفرگروپ نینگ نفت تازهلاوچی ایشخانهسینی تیکشیریش گه مؤفق بولگن، بیراق خوفسیزلیک تهدیدلری باعث، شیرخان و آقینه بندرلریدهگی ایشخانهلرنی تیکشیره آلمهگن. منبع گه کوره، قالگن ایکی بندرهگی ایشخانهلر تیکشیریلیشی گه زمینه یرهتیلیشی خصوصیده سعی و حرکتلر دوام ایتماقده و تیکشیروولر یکونلنگنیدن سونگ، هیأت گزارشی نی جمهورلیک ریاستی گه تاپشیرهدی.
اقتصاد وزیرلیگیدن بولگن باشقه بیر منبع بو معلومات نی تصدیقلیدی، بیراق حیرتان بندری تیکشیروویدن بولگن معلوماتلر توغریسیده بیلگی بیرمهیدی.
مذکور هیأت تشکیلاتی توغریسیده بولگن معلومات نی سلاموطندارنینگ اختیاریده بیرگن جمهورلیک ریاست سیلاوی نینگ نامزدی رحمتالله نبیل نینگ ایتیشیچه، محمداشرف غنی نینگ سیلاو تیمی جمهورلیک ریاست سیلاویده چمهسی 175 میلیون دالر صرفلهگن؛ بو مبلغ دن بیر قسمی جمهورلیک ریاستی نینگ 91- کُدی دن و باشقهسی غضنفر بانک نینگ سرمایهسیدن صرفلنگن.
جناب نبیل گه کوره، سیلاو کمپاینلری اوچون کوپ پول کوتریلگنی باعث، غضنفر بانک نینگ خزانهسی بوش بولگن و حکومت غضنفرگروپ نینگ نفت تازهلاوچی ایشخانهلرینی ساتیب آلیب بیجا کیتگن پوللرنی جبران قیلهدی. نبیل نینگ ایشانچی گه کوره، غضنفرگروپ نینگ نفت تازهلاوچی ایشخانهلری «ایسکی بولگنی باعث، ایشدن قالگن.»
جمهورلیک ریاستی نینگ اوز نامزدی نی ادعا قیلیشیچه، بو برنامه گه علاوه، غضنفرگروپ 17 تورلی سوداگرلیک توارلری نینگ مالیاتیدن معاف بولگن؛ سلاموطندار بو ادعانی حکومتی منبع تامانیدن تصدیقلهشی یا-ده رد قیلیشی گه مؤفق بولمهدی.
جمهورلیک ریاستی و غضنفرگروپ جناب نبیل نینگ بیاناتی توغریسیده صحبت بیریش گه حاضر بولمهدیلر، بیراق فاریاب ولایتیدن بیر منبع نینگ تصدیق قیلیشیچه، آقینه بندری ده غضنفرگروپ نینگ ایشخانهلری دولتی ییرلرده ایجاد ایتیلگن.
بلخ ولایتیده غضنفرگروپ ایشخانهسینی باشلیغی بهادرنینگ ایتیشیچه، غضنفرگروپ ایشخانهسی میلادی 2012- ییلده قوریلگن و اونینگ اسکونهلری ایسکیلنمهگن. جناب بهادر گه کوره، غضنفرگروپ نینگ ایشخانهلری اینگ یوقاری صفت بیلن نفت تازهلیدی و بو کارخانهده تازهلنگن نفت سلبی 20 درجه ساووقلیکده قاتیمهیدی.
شو توغریده…
جمهورلیک ریاست سیلاوینینگ نامزدی رحمتالله نبیل بیلن خاص صحبت
