افغانستان نینگ تورلی منطقه‌لریده امنیتی کوچلر و طالبان گروهی اوروشیب کیلماقده، بیراق ملی مدافعه وزیرلیگی اوشبو اوروشلرده طالبان گروهی مغلوب بولگنیدن خبر بیره‌دی.
کابل‌ده کماندو کوچلری نینگ ینگی قومندانی نی تانیشتیریش مراسم‌ده ملی مدافعه وزیرلیگی سرپرستی اسدالله خالدنینگ ایتیشیچه، طالبان گروهی نینگ الفتح عملیاتی ناکام بولگن و مملکت نینگ تورلی منطقه‌لریده مذکور گروه تامانیدن اویوشتیریلگن هجوملر امنیتی کوچلر تامانیدن آرقه گه اورولگن.
جناب خالدگه کوره، طالبان گروهی اوتگن ییل‌لرگه قره‌گنده حاضرگچه مملکت نینگ بویوک شهرلریدن هیچ بیرینی قولگه کیریته آلمه‌گن.
بیراق، حربی ایش بیلرمان جاوید کوهستانی، ملی مدافعه وزیرلیگی سرپرستی نینگ بو بیاناتی نی حقیقت دن اوزاق دییدی.
جناب کوهستانی نینگ سلام‌وطندارگه ایتیشیچه، طالبان گروهی قطار ولایت‌لرده اویوشتیرگن عملیات‌لریده آغیر قربانلیک بیرگن، بیراق امنیتی کوچلر هم قربانلیک‌سیز بولمه‌گن.
اوشبو حربی ایش بیلرمان گه کوره، طالبان گروهی حاضرگه‌قدر ایلگریدن نظارت گه آلگن منطقه‌لریده حاکم دیر.
جناب کوهستانی اورنک شکلده کابل-قندهار قتناو یولی گه اشاره قیلیب ایتیشیچه، طالبان گروهی ایریم پیت‌لر بو قتناو یولنی توسیب و نیچه ییرده چیک‌پاینت ایجاد قیله‌دیلر.
عین حالده، سونگی ایکی هفته ده طالبان گروهی کابل شهری نینگ ایچیده امنیتی کوچلرنینگ پوسته‌لری اوستیگه هجوم قیلگن.
طالبان گروهی بیر مرته کابل شهری نینگ 7- ناحیه‌سیده بولگن پولیس کوچلری پوسته‌سی اوستیگه هجوم قیلیب و باشقه بیر مرته پلچرخی تنگناسی نظم‌عامه کوچلری گه تیگیشلی پوسته‌نی هدف قرار بیرگن.
