افغانستان بوییچه انسان قاچاقی خصوصیده تدقیقات اوتکزیلگنده اچینرلی موضوعلر یوزگه چیقهدی. کمیده 10 آی آلدین قشاقلیک و ایشسیزلیک باعث، احمد آتلی یاش ییگیت 7 کیشیلیک عایلهسی نینگ نفقهسینی تأمینلش اوچون مهاجرلیککه قصد قیلیب و ایران تامان یول آلهدی. 22 یاشیدن بولگن احمد قاچاقچی گه ایکی میلیون تومان بیرگنیدن سونگ، غزنی ولایتیدن بیر گروه باله و اوسمیرلر بیلن بیرگه نیمروز یولیدن آچلیک و سووسیزلیکنی باشیدن کیچیریب اصفهان گه ییتیشگن.
او، ایران ده 8 آی ایش قیلگن، بیراق ایش ایگهسیدن حقوقینی طلب قیلگن چاغیده، ایرانیلیک الاولوغی احمدنی پولیس گه تاپشیرگن.
کوزی یاشلی و بغضی توله احمدنینگ ایتیشیچه، ایران پولیسی آغیر شکلده کلتکلب و کوپلب قیناققه سالگنیدن سونگ، اوندن سوریه اوروشی گه باریشی یا-ده افغانستان گه قیتیشی نی سورهگن.
ایران پولیسی نینگ یامانلیگی دن یالغیز احمد شکایت قیلمهیدی. شونینگدیک، اونینگ هماتاقیلریدن بیرقطاری نینگ ایتیشیچه، ایران پولیسی شیعه یاشلر و اوسمیرلرنی کوپلب قیناققه سالگنیدن کیین سوریه ده بولگن فاطمیون گروهی گه قوشیلیش اوچون مجبور قیلهدی.
غزنی ولایتیدن بولگن 19 یاشر رضا هم احمدنینگ باشیدن اوتگن موضوع گه ماس موضوع نی حکایت قیلهدی. اونینگ ایتیشیچه، ایران پولیسی افغانستانلیک شیعه یاشلرنی زوردن سوریه اوروشی گه یوبارهدی.
احمد و رضا بیلن ایکی باله هم همسفر ایکن. محمد و سخی 14 و 15 یاشلریده دیر. اولرنینگ ایتیشیچه، آلتی آی آلدین فاریاب ولایتیده قاچاقچی تامانیدن الدهنگنلر و ایکی میلیون تومان توللگنلریدن سونگ، کوپینچه آرزو و ایستک بیلن ایران تامان یول آلگنلر.
مذکور ایکی باله ایران گه ییتیشگینچه نیچه مرته قاچاقچیلر و یول اوغیرلاوچیلری تامانیدن ساتیلگنلر و اون کوندن کیین مقصدگه ییتیشگنلر. محمدنینگ ایتیشیچه، همسفرلریدن بیرقطاری یول جریانیده تلف بولگنلر.
هرات محلی مسؤوللری نینگ ایتیشیچه، کونده اونلرچه ایرکک و عیال ایران دن جبری شکلده سورگون ایتیلهدیلر و اسلامقلعه چیگرهسیدن هرات گه ییتیب کیلهدیلر.
سلاموطندارگه صحبت بیرگن هرات ولایتی نینگ مهاجرلر و باشپناه ایزلاوچیلر ریاستی باشلیغی جاوید نادم نینگ ایتیشیچه، 1397- ییلده 160 مینگ کیشی جبری شکلده و 250 مینگ کیشی اختیاری شکلده ایران دن افغانستان گه قیتگنلر. جناب نادم گه کوره، سورگون ایتیلگن کیشیلرنینگ جملهسیدن 68 تهسی سرپرستسیز عیال و 3500 تهسی باله دیر.
هرات ولایتی نینگ مهاجرلر و باشپناه ایزلاوچیلر ریاستی باشلیغی، مهاجرلر ایران پولیسی تامانیدن کلتکلنگنینی تصدیقلیدی. اونینگ ایتیشیچه، اوتگن ییل ایران پولیسی نینگ بدرفتارلیگی دن مذکور اداره ده 3 شکایت رویخطگه آلینگن.
هرات حاکمی سوزلاوچیسی جیلانی فرهادنینگ ایران دن افغانستان مهاجرلری گروهی شکلده سورگون ایتیلیشی و مذکور مملکتده مهاجرلر قیناققه سالینیشی توغریسیده ایتیشیچه، اولر ایران رسمیلریدن ایکی مملکت نینگ دوستلیک علاقهسینی نظرگه آلیب و مهاجرلر زوردن سورگون ایتیلیشی گه توسیق بولیشلرینی سورهیدی.
هرات ولایتیده انسان حقلری ساحوی کمیسیونی، مهاجرلرگه قرشی ایران پولیسی نینگ بدرفتارلیگی دن خواطر بیلدیریب ایتیشیچه، مملکت ایچیده بالهلر قاچاقی تیزیم و علاقهوی شکلده مافیا گروهلری تامانیدن عملگه آشیریلهدی.
مهاجرلر قاچاقی و انسان قاچاقی قربانلریگه یاردم بیریش ملی میکانیسم (NRM)، افغانستان دولتینینگ مهاجرلر قاچاقی و انسان قاچاقیگه قرشی کورهش یوکسک کمیسیونی تامانیدن تیارلنیب و تصدیقلنگن. اوشبو میکانیسمدن مقصد انسان قاچاقی و مهاجرلر قاچاقی قربانلریدن حمایت قیلیب و اولرگه یاردم بیریب و شونینگدیک، قاچاقچیلرنی تانیب قضایی ادارهلریگه تانیشتیریب (2017- ییل مصوبهسی) انسان قاچاقی گه قرشی کورهش قانونی اساسیده، دولت و دنیاجماعهچیلیگیگه یولچیلیک قیلیش بولگن.
مهاجرلر قاچاقی و انسان قاچاقی قربانلریگه یاردم بیریش ملی میکانیسم (NRM) نینگ 8- مادهسی و 12- بندی ده انسان حقلری کمیسیونی نینگ وظیفهلری توغریسیده بوندهی دییلگن:
- انسانی قاچاقی و مهاجرلر قاچاقی جنایتلری آلدی آلینیشی اوچون تعلیماتی لایحهلرنی تیارلش و عمل گه آشیریش بولیب و شونینگدیک، انسانی قاچاق و مهاجرلر قاچاقیدن زیان کورگن کیشیلر خصوصیده، انسان حقلرینی نظرگه آلیش دیر.
- انسان قاچاقی و مهاجرلر قاچاقی گه تیگیشلی قانونلرنی تیارلش و اصلاحات کیلتیریش اوچون همکارلیک قیلیش دیر.
- انسانی حقلری کمیسیونی نینگ عمومی تیکشیروو چوکاتی اساسیده، انسان قاچاقی و مهاجرلر قاچاقیدن ضرر کورگن کیشیلرنینگ انسانی حقلرینی تیکشیریش دیر.
- 4 آی دوامیده قیلگن ایشلردن انسان قاچاقی و مهاجرلر قاچاقی گه قرشی کورهش عالی کمیسیونی نینگ گزارشینی نشر قیلیشدن عبارت.
- انسان قاچاقی و مهاجرلر قاچاقی توغریسیده بولگن جنایتلرنی انسان قاچاقی و مهاجرلر قاچاقی گه قرشی کورهش کمیسیون آرقهلی مذکور اداره گه تاپشیریلهدیگن ایشلرنی عمل گه آشیریش دیر.
عین حالده، هرات ولایتی بوییچه ایران قنسولی، افغانستان مهاجرلریگه قرشی ایران پولیسلری نینگ بدرفتارلیگینی رد قیلیب ایتیشیچه، هر بیر کیشی نینگ قانونی حجتی و پاسپورتی بولمهگن صورتده، ایران ده یشش گه حقلی ایمس دیر و شو یوزهدن اوز مملکتی گه قیتریلیشی کیرهک.
