تخار ولایتی دشتقلعه تومنینینگ طالبلر وجودیدن تازهلش اوچون قوشمه حربی عملیات یولگه قوییلگن.
دشتقلعه تومنینینگ یشاوچیلریگه کوره، قیشلاقلر و اهالی اویلریده اوروشنینگ دوامی بار و طالبان جنگریلری مسکونی اویلرگه جایلشگنلر.
اولرنینگ کوپهیتیریشیچه، طالبان جنگریلری، امنیتی کوچلرگه قرشی آغیر قورالدن قولنهدی و کوپ قطار اوقلر تینچاهالی اویلریگه توشگن. مذکور تومن یشاوچیلریگه کوره، امنیتی کوچلر و طالبان جنگریلری آرهسیده صورت تاپگن آتیشمه نتیجهسیده تینچاهالیدن بیرقطاری اولیب و یرهلنگنلر.
بیراق تخار حاکمی سوزلاوچیسی جواد هجرینینگ ایتیشیچه، مذکور عملیاتده طالبان جنگریلریدن کوپ قطار هلاک ایتیلیب و یرهلنگنلر.
اونینگ ایتیشیچه، طالبان جنگریلری اهالی اوینی هدف قرار بیریش بیلن عملیات توختهتیلیشی اوچون سعی و حرکت قیلهدی.
تخار حاکمی سوزلاوچیسینینگ کوپهیتیریشیچه، کوچه اطرافیدهگی تومنلر طالبلر وجودیدن تازهلنگن گهقدر حربی عملیات دوام تاپهدی.
اونینگ ایتیشیچه، آتیشمه نیتجهسیده 8 تینچاهالی یرهلنگن و اولردن بیرقطارینینگ ساغلیق وضعیتی خواطرلنترووچی دیر. جناب هجریگه کوره، طالبان جنگریلریدن 30 تهسی مذکور عملیاتده هلاک ایتیلیب و یرهلنگنلر.
