قندوز ولایتینینگ امامصاحب و دشتارچی تومنلری هیداوچیلریدن بیرقطارینینگ سلاموطندارگه ایتیشیچه، مذکور ایکی تومننی قندوز شهری و قندوز شهرینی شیرخان بندری گه باغلهیدیگن قتناو یولده قوراللی اوغیرلاوچیلیک کوپهیگن.
اولرگه کوره، مذکور قتناو یولده قوراللی کیشیلر چیک پاینت ایجاد قیلیب و یولاوچیلرنینگ پولی و ماللرینی تالان قیلهدیلر.
اولرنینگ کوپهیتیریشیچه، قوراللی اوغیرلاوچیلر چیک پاینتلرینی پولیس پوستهلرینی 100 مترلیگیده ایجاد قیلهدی؛ بیراق پولیس کوچلری هیچ قندهی عکسالعمل کورستمهیدیلر.
مذکور قتناو یول هیداوچیلریدن ایکی کیشی محمدنجیب و بشیرنینگ سلاموطندارگه ایتیشیچه، قوراللی اوغیرلاوچیلر 2 آی جریانیده اونلرچه موترنی یولاوچیلرینینگ ماللرینی اوزلری بیلن آلیب کیتگن و بو موضوع اولرنی خواطرگه سالگن.
شونینگدیک، قندوز ولایت کینگشی باشلیغی محمدیوسف ایوبی نینگ ایتیشیچه، اوشبو قتناو یولده قوراللی اوغیرلاوچیلیک کوپهییشی اهالینی خواطرگه سالگن.
اونینگ کوپهیتیریشیچه، اولر هیداوچیلرنینگ شکایتینی رسمی شکلده امنیتی ادارهلرگه ییتکیزگن و بو قیینچیلیک حل ایتیلیشی اوچون امنیتی ادارهلر سعی و حرکت قیلیشلری کیرهک.
عین حالده، قندوز پولیس قومندانلیگینی خوفسیزلیک آمری صفیالله محزون نینگ ایتیشیچه، اوشبو قتناو یولده یوز بیرگن قوراللی اوغیرلاوچیلیکلر اوتمیشلرگه تیگیشلی بولهدی.
اونگه کوره، حربی کینگش قراری اساسیده، حاضر بو قتناو یولده سیار گیزمهلر ایجاد ایتیلگن و هیچ بیر قیینچیلیک قالمهگن.
قندوز-امامصاحب و قندوز-شیرخان بندر قتناو یولی مذکور ولایتنینگ اونملی قتناو یوللریدن بیری سنلهدی و کونده اونلرچه یوک و یولاوچی تاشیووچی نقلیه واسطه بو قتناو یول آرقهلی تاجیکستان باریب و کیلهدی.
