تخار ولایتینینگ اشکمش تومنیده 12 کون آلدین بیر قورالی آتیشمه نتیجهسیده مذکور تومن شاهمشرف قیشلاغینینگ استا بابا آتلی بیر یشاوچیسی اولیب و باشقه ایکی اوغلی یرهلنگن ایدی.
اوشبو واقعه عامللرینینگ قولگه آلینمهگنی سبب بوگون "چهارشنبه" مذکور تومن یشاوچیلریدن اونلرچهسی و مقتولنینگ عایله اعضالری ناراضلیک نمایشی یولگه قویگنلر. مقتولنینگ اقاربلری، اشکمش تومنینینگ دفتری برابریده کیلیب قاتللرنینگ قولگه آلینیب محکمه ایتیلیشینی سورهگنلر.
ناراضچیلرنینگ ایتیشیچه، اشکمش تومنینینگ ولسوالی محرابالدین حقجو نینگ قورقچیسی استا بابا نی اولدیریب و ایکی اوغلی یرهلنتیرگن.
تخار محلی حکومتیدن قطار منبعلرنینگ ایتیشیچه، اشکمش تومنینینگ ولسوالی محرابالدین حقجو بوگون "چهارشنبه" توشدن سونگ تالقان شهریگه انتقال بیریلگن.
بیراق اشکمش تومنینینگ ولسوالی محرابالدین حقجو نینگ ایتیشیچه، نمایندهلر کینگشی اعضاسی سید اکرامالدین معصومی گه تیگیشلی بولگن قورالی کیشیلر تومن بیناسی اوستیگه هجوم قیلگنلر.
نمایندهلر کنیگشی اعضاسی سید اکرامالدین معصومینینگ فکرینی آلیش اوچون سعی و حرکت قیلدیک بیراق موفق بولمهدیک.
عینحالده، تخار حاکمینینگ سوزلاوچیسی جواد هجرینینگ ایتیشیچه، اشکمش تومنینینگ قطار یشاوچیلری استا بابا اولیب و ایکی اوغلی یرهلنگنی سبب مذکور تومنده ناراضلیک نمایشی یولگه قویگنلر.
جناب هجری گه کوره، اوشبو واقعه عامللریدن بیری قولگه آلینگن و باشقه ایکی تهسی نی قولگه آلیش اوچون سعی و حرکتلرنی دوامی بار.
