مملکت‌ده یوز بیرگن هر بیر ترورچیلیک واقعه اهالی آره‌سیده اخلاقی حساسیت‌لر، قیغوداشلیک و واقعه یره‌دارلری قوتقریلیشی اوچون سعی و حرکت‌لرگه سبب بولیب و اولرنی تیزلیک‌ده واقعه یوز بیرگن محل‌گه تارته‌دی. بیراق، بونده‌ی بیر وضعیت‌ده حادثه یره‌دارلریگه قنده‌ی بیر شکلده توغری و فایده‌لی شکلده یاردم بیریش کیره‌ک. یشاوچیلر بوندن آرتیق نرسه‌نی بیلمه‌یدی. اولر حادثه یره‌دارلرینی تیزلیک‌ده کسلخانه گه ییتکزیش اوچون سعی و حرکت قیله‌دیلر؛ لیکن حقیقت شو دیر کیم، ایریم پیت‌لر دستلب یره‌لنگن کیشی‌نینگ قانی توخته‌لیشی اوچون دستلبکی یاردملردن فایده‌لنیب و اولرگه یخشی بیر شکلده یاردم بیریب بوله آله‌دی.
شو مسئله باعث، شهرگه باش اوریب و بو مسئله‌لر توغریسیده یشاوچیلردن بیرقطاری بیلن صحبت اوتکزدیم. صحبت قیلگن کیشی‌لرنینگ ایتیشیچه، حادثه محلی‌دن اوزاقلش اورنیده یره‌دارلرگه یاردم بیریش‌نی سیوه‌دیلر، بیراق بو سعی و حرکت‌لری یره‌دارلرنینگ منفعتی گه تمام بولیش و بولمه‌سینی بیلمه‌یدیلر. اولرنینگ ایتیشیچه: «بیزلر دستلبکی یاردم توغریسیده هیچ نرسه بیلمه‌یمیز.»
کابل یشاوچیلریدن حسین معاذالله نینگ ایتیشیچه، قانلی واقعه یوز بیرگن چاغیده، اولر یره‌لنگن‌لرنی کسلخانه گه انتقال بیریشی گه قوشیمچه، اولرنینگ یره‌لرینی آز دیب اولرگه جرأت و دلدارلیک بیره‌دیلر. اولرنینگ فکریچه، قورقینچ درد و یره کبی بیر حادثه‌نینگ قربانلرینی اولیم‌گه تارته‌دی.
عین حالده، جراحلیک متخصص داکترلر فرقلی فکر بیلدیره‌دیلر. عطاالله هجران نینگ ایتیشیچه، یره‌لنگن‌لرنینگ قوتقریش و اولرگه دلدارلیک بیریش سعی و حرکتی انسانی و ضروری بیر ایش دیر، بیراق ایریم پیت‌لر اولرنینگ اولیم‌دن قوتقریشی گه سبب بولمه‌یدی.
چونکه جناب هجران‌نینگ ایشانچی گه کوره، ایریم پیت‌لر واقعه نتیجه‌سیده بیر کیشی‌نینگ بوینی یا-ده باشقه بیر ییری سینگن چاغیده، اویلمس‌دن و تیزلیک‌ده موتر آرقه‌لی کسلخانه گه انتقال بیریش نه‌فقط اونگه یاردم بیرمه‌یدی، بلکیم اولیمی گه سبب بوله‌دی. شو یوزه‌دن مسؤول اداره‌لر یشاوچیلر بیلن دستلبکی یاردملردن قنده‌ی بیر شکلده فایده‌لنیش توغریسیده ایش قیلیشی کیره‌ک.
عین حالده، ساغلیق‌نی سقلش وزیرلیگی سوزلاوچیسی وحید مجروح، یشاوچیلر دستلبکی یاردملردن قنده‌ی بیر شکلده فایده‌لنیشی توغریسیده خبرسیزلیگی‌نی تصدیق‌لب و اورگه‌تیلیشی‌نی اساسی ضرورت بیلیب ایتیشیچه، مذکور وزیرلیک بو توغریده ایش باشله‌گن، بیراق اوندن ایجابی نتیجه آلیشی توغریسیده بودجه کیره‌ک و ساغلیق‌نی سقلش وزیرلیگی‌نینگ بودجه‌سی یوق دیر.
شونینگدیک، ایچکی ایشلر وزیرلیگی سوزلاوچیسی نجیب دانش‌نینگ ایتیشیچه، پولیس کوچلری‌نینگ مسؤولیتی و اورگه‌تیشی‌دن بیر بولیمی حادثه یره‌دارلریگه قنده‌ی بیر شکلده قره‌ش و دستلبکی یاردملردن فایده‌لنیش دیر. بیراق، یشاوچیلر بو تعلیمات‌دن قنده‌ی بیر شکلده فایده‌لنیشی توغریسیده، جناب دانش هیچ نرسه دیمه‌یدی.
افغانستان سونگی دهه‌لرده کوپینچه قانلی ترورچیلیک واقعه‌لرگه بولیب کیلگن. شو یوزه‌دن بو واقعه‌لرگه قنده‌ی بیر شکلده یوزمه یوز بولیشی یشاوچیلرگه اورگه‌تیلیشی لازم؛ لیکن واقعه‌لر میزانی آشیشی بیلن بو ایش‌لردن هیچ قنده‌ی نشانه کورینمه‌گن.
