قندوز ولایتیده قاچقینلر و باش پناه ایزلاوچیلر ریاستی باشلیغی عبدالسلام هاشمینینگ سلاموطندارگه ایتیشیچه، مذکور ولایتنینگ قلعۀ زال تومنی مرکزی آقتپه بازاری قوراللی طالبلرنینگ نظارتی گه اوتگنی باعث، کمیده بیر مینگ عایله بدرغه بولگن.
هاشمی گه کوره، بدرغه بولگنلرگه یاردملر ترقهتیلیشی اوچون سعی و حرکت دوام ایتماقده.
دشت آبدان گه قلعۀ زال تومنیدن بدرغه بولیب کیلگنلردن بیرقطارینینگ ایتیشیچه، باشپناه یوقلیگی، ییگولیک آذیق و اوقت و ساغلیق خذمتلریگه قول تاپه آلمسلری اولرنینگ یمان وضعیت گه دوچار قیلگن.
اوشبو بدرغهلردن ایکی کیشی نجیب و مالکنینگ سلاموطندارگه ایتیشیچه، آقتپه قیشلاغیدن بدرغه بولگن 500 عایله سوو کملیگی، ییگولیک آذیق و اوقت و باشپناه سیزلیک قیینچیلیکلریگه روپهره بولیب تورگنلر.
عین حالده، قندوز ولایتینینگ ملی خوفسیزلیک 09 قطعهسی قومندانی سیدیاسین سدادنینگ ایتیشیچه، امنیتی کوچلر اوچ کوندن سونگ، قلعۀ زال تومنی مرکزی آقتپه بازارینی قیتهدن نظارت گه آلگن.
سدادگه کوره، آقتپه قیشلاغینی قیتریب آلیش عملیات نتیجهسیده 17 جنگری طالب هلاک و باشقه 14 جنگری طالب یرهلنگن. اونینگ کوپهیتیریشیچه، اوشبو عملیاتده 1 عسکر هلاک و باشقه 3 عسکر یرهلنگن.
قلعۀ زال تومنی مرکزی آقتپه بازاری و اوشبو تومننینگ باشقه 86 قیشلاغی اوچ کون آلدین قوراللی طالبلرنینگ نظارتی گه اوتگن ایدی.
