.jpg)
د کډوالو او راستنېدونکیو چارو وزیر سیدحسین عالمي بلخي هرات کې په یوې خبري غونډې کې وویل چې د هرات لوېدیځ ته په ۳۵ کیلومټرۍ کې پروت د سعادت ښارګوټی د قرباني شویو امنیتي ځواکونو کورنیو او یوه برخه یې له بهره راستنېدونکیو ته جوړېږي.
د کډوالو او راستنېدونکیو چارو وزیر همداراز وویل چې دا ښارګوټی څو کاله مخکې په پام کې نیول شویو او نن یې د جمهوري ریاست د ۳۰۵ فرمان پر اساس د جوړولو عملي چارې پیل شوې.
د ښاغلي بلخي په خبره، دا ښارګوټې دوې برخې لري چې یوه یې په هرات او بله یې په کابل ښار کې ده چې د ۳۲ میلیونو یورو په لګښت جوړېږي او په وینا یې، «یو اېن هبیتات» د یو بل ښارګوټي د جوړولو هوکړه کړېده.
د هرات والي محمد آصف رحیمي هم وایي چې د دې ښارګوټي لهپاره په ټوله کې ۶ زره جریبه ځمکه په پام کې نیول شوې.
د هرات د والي په وینا چې د دې ښارګوټي په جوړېدو سره ۸ زره کورنیو ته کورونه وېشل کېږي.
.jpg)
د هرات والي وایي چې دا ښارګوټی په دوه فازو کې جوړېږي چې لومړی فاز یې په راتلوونکیو ۳۰ میاشتو کې بشپړېږي.
د ښاغلي رحیمي په خبره، دې ښارګوټي ته د «یو اېن هبیتات» له لوري تر اوسه مشخصه بودیجه په پام کې نهده نیول شوې؛ خو په پام کې ده چې د ۳۲ میلیونو یورو څخه ډېره برخه یې هرات ولایت ته جذب کړي.
په همدې حال کې د راستنې شوې کورنۍ چې څو کاله مخکې پهدې سیمه کې ځای پرځای شوي؛ له حکومت او د کډوالو او راستنېدونکیو چارو وزارت نه غواړي چې د بېخبناوو د جوړولو تر څنګ دې د دې سیمې ټرانسپورټي ستونزې هم هوارې کړي.
