د ننګرهار خوږیاڼو، شېرزاد او حصارک ولسوالیو قومي مشران او اوسېدونکي وايي، امنیتي ځواکونه دې د خپلو عملیاتو پرمهال د ولسي خلکو ژوند ته پام وکړي.
دوی چې تر لاریون وروسته یوې خبري غونډې کې خبرې کولې وویل، له تېرو ۳ میاشتو راهیسې د ملي امنیت ځانګړې قطعې په عملیاتو کې شاوخوا ۱۶۰ ملکیان وژل شوي چې سپینږیري، ښځې او ماشومان هم پهکې دي.
د یادو ولسوالیو قومي مشرانو دلاور، عزیز خوږیاڼي او نوراغا ځواک وویل، د ملي امنیت ځانګړې قطعې په عملیاتو کې خلکو ته مالي زیانونه هم اووښتي. دوی پر حکومت، په ځانګړې توګه یادو ځواکونو غږ وکړ چې د ملکیانو وژلو لړۍ دې پایته ورسوي، کهنه ولسونه به ورسره پرېکون وکړي.
په همدې حال کې د خوږیاڼو ولسوالۍ قومي مشر ابراهیم رسنیو ته وویل چې د ملي امنیت ۰۲ قطعې د عملیاتو له کبله ګڼې کورنۍ د خپلو کورونو پرېښودو ته اړ شوي او باید ژرترژره د ملکیانو د مرګژوبلې مخه ونیول شي.
موږ هڅه وکړه چې پهدې اړه د ننګرهار ولایتي ادارې نظر هم واخلو، خو له پرلهپسې اړیکو سره سره ونه توانېدو.
بلخوا یوناما په خپل تازه راپور کې ویلي چې سږکال د تېر هغه په پرتله، د بهرنیو او افغان ځواکونو د عملیاتو پرمهال د ملکیانو مرګژوبله ۵۲ سلنه ډېره شوې ده.
