د جنبش ګذار په نوم بنسټ سرلاري وایي د اساسي قانون ۶۱ مادې له مخې د ملي یووالي حکومت د کار موده بشپړه شوې او په دې ماده کې ناڅرګندتیا نهشته.
د دې بنسټ مشر هارون معترف وايي، د اساسي قانون ۶۱ مادې په اړه له حقوق پوهانو او سیاستوالو سره له څو میاشتو سلامشورو دې پایلې ته رسېدلی چې د اساسي قانون لهمخې د حکومت د کار موده څلور کاله ده او د غبرګلي له لومړۍ نېټې وروسته د حکومت دوام د ده په وینا مشروعیت نهلري.
د ټاکنو خپلواک کمېسیون پخوانی مشر فضل احمد معنوي هم وایي اساسي قانون پر ساده ژبه لیکل شوی خو د ده په وینا ارګ په لوی لاس هغه تحریفوي.
معنوي، له چارواکیو او سیاستوالو غواړي د ملي یووالي حکومت د کار پای جدي وګڼي.
خو د ولسمشر مرستیال ویاند دواخان مینهپال دا څرګندونې بې بنسټه ګڼي او وایي، د ولسمشر د کار موده د ۱۳۹۸ کال د غبرګولي پر لومړۍ نېټه پای ته رسېږي.
په همدې حال کې د جنبش ګذار سرلارو په غونډه کې ۶ ماده یي بدیل طرحه هم وړاندې کړه چې د لنډ مهاله حکومت جوړېدل، د ملګرو ملتو او ناټو په مشري ټاکنې او د پوځي کمېټې جوړېدل یې غټ ټکي وو.
دا داسې مهال دی چې د ولسمشر دوه تېرې کاري دورې پنځه، پنځه کاله او له هغو هم اوږدې شوې وې خو هغه وخت چا دا مسله نه وه راپورته کړې او نه چا د اساسي قانون ۶۱ ماده یاده کړې وه.
