د کندهار د ښځو چارو ریاست مسوولان وايي، د روان ۱۳۹۸ کال له پيله تراوسه دغه ولایت کې له ښځو سره د تاوتریخوالي ۲۲۵ قضيې ثبت شوې دي.
د ياد ولايت د ښځو چارو رييسې رقیې اڅکزۍ سلاموطندار ته وویل، ښځو سره د تاوتریخوالي پېښو کې د میراث نه ورکړه، وهلټکول، له کوره تېښته، په کم عمر کې واده کول، د نفقې نه ورکړه او پر نورو سربېره، ۱ د جنسي تېري او ۳ د وژنې قضیې دي.
د نوموړې په وينا، ښايي دغه ډول نورې قضيې هم پېښې شوې وي، خو ډېری کورنۍ د ناوړه کلتوري دود له کبله نه غواړي چې دغه پېښې د ښځو له ملاتړو بنستونو سره شریکې کړي.
د رقيې په وینا، بېسوادي او د مېرمنو حقونو په اړه د خلکو نه پوهاوی، د ښځو پر وړاندې د تاوتریخوالي اصلي لاملونه دي.
په ورته وخت کې کندهار کې روڼاندي او د بشري حقونو فعالان وايي، په کار ده چې په دې اړه د ښځو چارو ریاست او نورې اړوندې ادارې د عامه پوهاوي لپاره هڅې زیاتې کړي.
د دوی په وینا، تر ټولو اړینه خبره داده چې دیني عالمان له منبره غږ پورته کړي، ځکه افغاني ټولنه کې د دیني عالمانو غږ تر هرچا ژر اورېدل کېږي.
کندهار کې د بشري حقونو فعالان زیاتوي چې د ښځو پر وړاندې تاوتریخوالی هغه مهال له منځه تلی شي چې کورنۍ د ښځو دیني او عصري زدهکړو ته پام زیات کړي.
