د هرات یو شمېر مدني فعالانو او اوسېدونکو نن د هرات د والي دفتر مخې ته په اعتراضیه را ټولېدنه کې د ایراني پولهساتو له لوري د افغان کډوالو سیند ته غورځولو پېښې په اړه د حکومت د رهبرانو پر خاموشۍ نیوکه وکړه.
د هرات مدني فعالان ددې پېښې تر سره کول ناانساني او د کډوالۍ او بشر حقونو د قوانینو خلاف کړنه ګڼي او خبرداری ورکوي که دې پېښې ته رسېدنه ونه شي؛ په افغانستان کې به د ایران قونسلګرۍ وتړي.
دغه مدني فعلان همداراز له ایران دولته غواړي چې د دې پېښې په اړه د افغانستان خلکو ته وضاحت ورکړي.
دیني عالم نثاراحمد خیراندېش او د هرات ولایت اوسېدونکی مبین، سیند ته د افغان کاريګرو اچول د اسلامي اصولو خلاف عمل ګڼي او ټینګار کوي چې د افغانستان حکومت باید د ایران د دې کړنې په وړاندې غلي پاتې نه شي.
په تازګۍ سره د هرات د ګلران ولسوال عبدالغني نوري سلام وطندار ته وویل چې ۵۰ افغان کډوال د ذولفقار کنډو نه ایران ته دننه شول؛ خو د ایران پولهساتو ځواکونو له «بېل او عنبور» سره په دوی برید وکړ او له وسلې په ګټې اخیستو یې د هریرود سیند کې ډوب کړل.
د نوري په خبره، د سیمې اوسېدونکيو تر نیمروز ولایت پورې سیند ولټاوه؛ خو د نورو مړيو د موندلو هېڅ اثر پیدا نه شو.
د ګلران ولسوال زیاته کړه چې وړمه ورځ چې ايران هغه ۵۰ افغان کډوال د هريرود سيند ته غورځولي وو، ۳۰ يې ژوندي ژغورل شوي، د ۱۲ يې مړه موندل شوي او ۸ نور يې لا ورک دي.
د ایراني پولهساتو د وحشیانه چلند قربانیان، د هرات د کشک او رباط سنګي، غور او کابل ولایتونو اوسېدونکي وو.
په ورته مهال د هرات د والي ویاند جېلاني فرهاد وايي چې د سیمهيیزې ادارې د پلاوي څېړنې روانې دي او د څېړنو په بشپړېدو سره یې راپور د حکومت مرکزي ادارې ته سپارل کېږي.
خو په هرات کې د ايران قونسلګرۍ د يوې خبرپاڼې په خپرولو سره د ۵۷ افغانانو نيول او په اوبو کې ډوبول رد کړي دي او زياته کړې يې ده چې ايراني پوليس په دې پېښه کې هېڅ ښکېل نه دي.
