د پکتيا اوسېدونکي او د ولايتي شورا غړي وايي، تېر کال د کليو پراختيا او بيارغاونې وزارت له لوري د شاوخوا ۱۰میلیونه ډالرو په ارزښت د ۱۰۳ ښوونځيو لپاره د ودانیو جوړولو چارې پيل شوې چې وروسته یې کارونه په ټپه ودرېدل.
د پکتيا د ولايتي شورا رييس عبدالمالک ځاځی وايي، د یو کال په تېرېدو تراوسه هېڅ ښوونځی نه دی جوړ شوی. د نوموړي په وینا، که د دې ښوونځيو چارې ژر پيل نه شي، نو د موسم په بدلېدو به بل کال ته وځنډېږي.
د پکتيا یو شمېر اوسېدونکي وايي، ډېری ښوونځي يې ودانۍ نه لري او زدهکوونکي د ښوونځيو د ودانيو نشتوالي او لرېوالي له کبله نهشي کولای درسونو ته تعقيب کړي. دوی هم له مسوولانو غواړي چې هرڅه ژر د ښوونځیو لپاره د ودانیو جوړولو چارې پیل کړي.
د پکتیا ځايي چارواکي د ښوونځیو لپاره د ودانیو جوړولو د چارو نه پيل لامل د بودیجې نشتوالی بولي.
خو د پکتيا والي محمد حليم فدايي وايي، د ښوونځیو لپاره دغه ودانۍ د سعودي عربستان په مرسته جوړېږي چې ډېر ژر به یې بودیجه د ماليې وزارت له لوري د کليو پراختيا وزارت ته ولېږدول شي.
د دې ښوونځيو په جوړېدو سره شاوخو ۵۰ زره زدهکوونکيو ته خوندي فضا کې د ښوونې او روزنې زمینه برابرېږي.
د معلوماتو له مخې پکتيا ټول ۴۰۵ ښوونځي لري چې ۷۰ سلنه یې ودانۍ نه لري. دغو ښوونځیو کې ۲ سوه او ۶۰ زره زدهکوونکي درس لولي او له ډلې یې ۷۰ زره نجونې دي.
