د هرات د عامې روغتيا رياست مسوولان وايي چې د ياد ولايت ۵ ولسواليو کې د امنيتي ګواښونو له کبله کور په کور د پوليو ضد واکسين نه تطبيقېږي.
د دوی په وينا، ښايي چې کشک کهنه، کشک رباط سنگي، ادرسکن، شینډنډ او پښتونزرغون ولسواليو کې ډېر ماشومان د پوليو ضد له واکسينه بېبرخې پاتې شي.
د هرات د عامې روغتيا رياست مرستيال اصف کبیر وايي، اوس مهال د هېواد په لوېديځ کې د ګوزڼ ۷ پېښې پېژندل شوي چې له دې ډلې ۴ يې فراه، ۲ هرات او يوه هم په بادغيس کې ده.
نوموړی وايي چې طالبان کشک کهنه، کشک رباط سنگي، ادرسکن، شینډنډ او پښتونزرغون ولسواليو کې اجازه نه ورکوي چې کور په کور د پوليو ضد واکسين کمپاين پيل شي.
اصف کبیر خبرداری ورکوي، که چېرې ناامنۍ او طالبان د واکسين د تطبيق مخه ونيسي، ډېر ماشومان به تل لپاره فلج شي.
د نوموړي په وينا، ټاکل شوې هرات کې د پوليو ضد واکسين په دې پړاو کمپاين کې ۶۵۴ زره ماشومان چې عمرونه يې له ۵ کلونو کم دي، واکسين شي.
د هرات د والي مرستيال نور احمد حیدري وايي، دوی هيله لري چې د قومي مشرانو په منځګړيتوب وکولای شي ناامنو ولسواليو کې هم د پوليو ضد واکسين تطبیق کړي.
ټاکل شوې هرات کې د روانې سنبلې مياشتې په ۲۴مه نېټه د دوشنبې په ورځ د پوليو ضد واکسين د تطبيق کمپاين پيل شي.
