په قطر کې د افغان دولت د سولې مرکچي پلاوي مشر معصوم ستانکزي د مصالحې عالي شورا له رییس عبدالله عبدالله سره په ګډې خبري ناسته کې وویل چې د افغانانو ترمنځ د خبرو پیلېدو له پرانېستغونډې وروسته د دولت او طالبانو د پلاویو ترمنځ لومړنۍ رسمي غونډه جوړه شوې ده.
د ستانکزي په خبره، په دې غونډه کې د دواړو خواوو ترمنځ پر ځینو لومړنیو مسایلو هوکړې هم شوي چې د تماس ډلې جوړېدل یې یوه هغه ده.
نوموړی وايي، دواړو لوریو د خبرواترو پر اصولو او د بحث وړ موضوعاتو د پیل پر څرنګوالي هم هوکړې شوي چې نن ورته د دولت او طالبانو مرکچي پلاوي چمتووالی نیسي.
په قطر کې د طالبانو د سیاسي دفتر ویاند محمدنعیم بیا وايي چې د دواړو لوریو د تماس ډلې تر اوسه کومه رسمي غونډه نه ده کړې.
د نوموړي په وینا، کله چې د تماس ډله په خپلو کې سره کېني، د دواړو لوریو د مرکچي پلاویو د ناستې لپاره به لار هواره کړي.
د یادونې ده چې د دولت او طالبانو مرکچي پلاویو د تماس ډلې لپاره پنځه-پنځه کسان ور پېژندلي دي.
محمدمعصوم ستانکزی د افغان دولت د ډلې مشري کوي او ټاکل شوې وه چې نن به په خپلو کې سره کېني او د دولت او طالبانو د مرکچي پلاویو ترمنځ د خبرواترو پر اجندا چې ښايي سبا پیل شي، بحث وکړي.
