افغانستان تینچلیگی بوییچه آمریکا خاص نمایندهسی زلمی خلیلزاد، افغانستان حکومتی و طالبان تامانیدن محبوسلر قوییب یوباریلیشی نی خوش قرشیلگن.
او، محبوسلر قوییب یوباریلیشی نی تینچلیک پروسهسی و زوروانلیک نی کمهیتیریش گه اونملی بیر آدیم دیگن.
بوگون (دوشنبه 25- حمل) جناب خلیلزاد بیر توییت آرقهلی یازیشیچه، ایکی تامان تینچلیک کیلیشوونامهسیگه بیللیلنگن هدفلرگه قول تاپیش اوچون سعی و حرکتلرنی کوپهیتیریشلری کیرهک.
افغانستان تینچلیگی بوییچه آمریکا خاص نمایندهسی نینگ اورغولب ایتیشیچه، قماقخانهلرده کرونا ویروسی کینگهیشی محبوسلر اوچون کتته تهدید دیر و محبوسلرنی قوییب یوباریش پروسهسی تیزلیککه عمل گه آشیریلیشی کیرهک.
شوندهی بیر حالده، طالبان گروهی اوتگن کون شام چاغی افغانستان امنیتی کوچلریدن ۲۰ تهسینی توتقوندن آزاد قیلگنلرینی اعلام قیلدی.
اونگه کوره، قوییب یوباریلگن محبوسلر قندهار ولایتیدهگی قیزیل خاج ادارهسیگه تاپشیریلیشی ممکن.
افغانستان حکومتی طالبان محبوسلریدن 300 تهسینی بگرام قماقخانهسیدن قوییب یوبارگن بیرحالده، افغانستان حکومت محبوسلری طالبان قماقخانهلریدن قوییب یوباریلهدی.
بوگون دوشنبه ملی خوفسیزلیک کینگش سوزلاوچیسی جاوید فیصل توییتری بیر پیام آرقهلی یازیشیچه، حکومت جمهوررئیس غنی نینگ بویروغی اساسیده، حاضرگچه 361 طالب نی قوییب یوبارگن.
جناب فیصل نینگ ایتیشیچه، جمهورلیک ریاستی نینگ بویروغی اساسیده محبوسلرنی قوییب یوباریش دوام تاپهدی و 1500 طالبان محبوسی تینچلیک پروسهسی و کرونا ویروسی گه قرشی کورهش اوچون قوییب یوباریلیشی ممکن.
حکومت اوتگن هفته (چهارشنبه کونی 20- حمل) طالبان محبوسلری نینگ قوییب یوباریش پروسهسینی باشلهدی و حاضرگچه مذکور محبوسلردن اوچ گروهی قوییب یوباریلگن.
تینچلیک کیلیشوونامهسی اساسیده، افغانستان حکومتی 5 مینگ طالبان محبوسی قوییب یوبارهدی و شونینگدیک طالبان افغانستان امنیتی کوچلریدن 1000 تهسی توتقوندن آزاد قیلهدی.
ایکی تامان محبوسلری قوییب یوباریلگنیدن کیین، افغانستان حکومتی و طالبان گروهی آرهسیده تینچلیک سوزلشووی باشلهنیشی گه قرار قیلینگن.
