افغانستان حکومتی ینه بیر بار طالبان گروهی دن زوروانلیک دن قول تارتیب و کرونا ویروس گه قرشی کورهش اوچون انسان دوستلیک آتیش‌کیسین نی قبول قیلیشینی طلب قیلدی.
بوگون «دوشنبه، 15- ثور» خبری بیر ییغین اوتکزگن جمهور رئیس سوزلاوچیسی صدیق صدیقی، انسان دوستلیک آتیش‌کیسین افغانستان حکومتی و اهالیسی نینگ اصلی ایستک‌لریدن دیب ایتیشیچه، طالبان گروهی اهالی نینگ بو ایسته‌گینی قبول قیلیب و زوروانلیک‌لر دوامیدن قول تارتیشی کیره‌ک.
جناب صدیقی نینگ ایتیشیچه، اوروش باعث، طالبان نینگ حاکمیتی ده بولگن منطقه‌لرنی یشاوچیلری گه ساغلیک یاردملری ییتیشمه‌یدی و حاضرگی شرایط ده طالبان گروهی کرونا ویروس نی جدی آلیب و آتیش‌کیسین قیلیشی لازم. اونگه کوره، بونده‌ی بولمه‌گن صورتده، وجودگه کیله‌دیگن فاجعه مسؤولیتی بو گروه نینگ بوینیگه بوله‌دی.
صدیقی نینگ کوپه‌یتیریشیچه، افغانستانده انسان دوستلیک آتیش‌کیسین برقرار ایتیلیشی خصوصیده، جهانی و منطقه‌وی کیلیشوو موجود دیر و بوتون دنیا و منطقه طالبان دن آتیش‌کیسین قیلیشینی طلب قیله‌دی.
جمهورلیک ریاست سوزلاوچیسی گه کوره، طالبان گروهی حاضرگه‌قدر تینچلیک‌که نسبتن اینگ آز سوز کورستگن و سونگی هفته‌لرده بو گروه نینگ هجوملری شدتلنگنی اوچون اهالی تینچلیک‌که نسبتن ایشانچی‌نی قولدن بیرگن. بیراق اونینگ اورغولشیچه، تینچلیک حاضرگه‌قدر افغانستان حکومتی نینگ اولویت‌لریدن بولگن.
ایتیش کیره‌ک کیم، مملکت ده کرونا ویروس رواجلنیب و کینگه‌یگن بیرحالده، حکومت نیچه مرته طالبان دن آتیش‌کیسین قیلیشینی سوره‌دی، بیراق بو گروه حاضرگچه بو ایستک‌که ایجابی جواب بیرمه‌گن.
ساغلیق‌نی سقلش وزیرلیگی تامانیدن بیریلگن رقم اساسیده، مملکت ده کرونا ویروس گه چلینگن‌لرنینگ رقمی 2894 کیشی گه ییتیشگن و بو آره‌دن حاضرگه‌قدر 397 کیشی ساغه‌یگن و باشقه 90 ته‌سی جان بیرگن.
