نمایندهلر کینگشی ملی دسترخوان برنامهسینی کوپینچه آواز بیلن رد قیلگنیدن سونگ، جمهورلیک ریاست سرایی نینگ سوزلاوچیسی صدیق صدیقی، خبری بیر ییغینده اوشبو قرارگه عکسالعمل ایتیشیچه، نمایندهلر کینگشی بو برنامه عملگه آشیریلیشی خصوصیده، حکومت گه یاردم بیریشی کیرهک.
اوشبو خبری ییغینده جناب صدیقی نینگ ایتیشیچه، ملی دسترخوان برنامهسی قشاقلیککه قرشی کورهش اوچون اینگ اونملی و کته برنامه دیر و بوندهی بیر شرایط ده اهالی گه یاردم بیریش دولت نینگ مسؤولیتی بولهدی.
صدیق صدیقی بو برنامه دن مقصد کمبغللرگه یاردم بیریش دیب ایتیشیچه، دنیا جماعهچیلیگی اوشبو برنامه عمل گه آشیریلیشی خصوصیده، افغانستان نی حمایت قیلهدی.
جمهورلیک ریاست سوزلاوچیسی نینگ کوپهیتیریشیچه، حکومت نمایندهلر کینگشی دن اوشبو ملی برنامه توغریسیده معلومات توپلهشینی کوتهدی.
جناب صدیقی نینگ ایتیشیچه، قیشلاقلرنی رواجلنتیریش و کینگهیتیریش وزیرلیگی، اوشبو برنامه توغریسیده نمایندهلرگه آچیقلیک بیریش اوچون حاضرگچه فرصت تاپمهگن.
نمایندهلر کینگشی نینگ اوتگن کونگی ییغینیده، نمایندهلردن بیرقطاری، بو برنامه نینگ بودجهسی تالان قیلینیشی دن خواطر بیلدیریشگن. نمایندهلرنینگ خواطری توغریسیده جناب صدیقی نینگ ایتیشیچه، نمایندهلر کینگشی نینگ اعضالری، بو برنامه ده نظارتی رول اوینه آلهدی.
بوگون «سهشنبه، 31- سرطان» نمایندهلر کینگشی نینگ خاص ییغینیده، «شنبه کون، 28- سرطان» جمهور رئیس تامانیدن آچیلگن «ملی دسترخوان» برنامهسی نمایندهلر کینگشی تامانیدن کوپینچه آواز بیلن رد قیلیندی.
نمایندهلر کینگشی نینگ بوگونکی ییغینیده مذکور کینگش نینگ مالی و بودجه کمیسیونی کاتبی سیدعظیم کبرزانی نینگ ایتیشیچه، «ملی دسترخوان» برنامهسی هیچ بیر بودجهوی بولیم، جمله دن مالیه وزیرلیگی نینگ بودجهوی بولیمی بیلن هماهنگ قیلینمهگن.
