افغانستان بوییچه بیرلشگن ملتلر تشکیلاتی نینگ اورین‌باسرلیک هیأت دفتری (یوناما) نینگ ایتیشیچه، افغانستان‌لیکلرارا سوزلشوولر جاری هفته نینگ آخری گچه قطر پایتختی دوحه ده یولگه قوییلیشی گه قرار قیلینگن.
یوناما بوگون (یکشنبه ۲۶- اسد) بیر توییت آرقه‌لی یازیشیچه، مذکور نهاد هیأت اعضالری اوتگن کون شنبه ۲۵- اسد افغانستان‌لیکلرارا سوزلشوولر باشله‌نیشی حقیده قطر ده طالبان سیاسی رهبرلری بیلن سوزله‌شگن.
بیرلشگن ملتلر تشکیلاتی نینگ اورین‌باسرلیک هیأتی افغانستان‌لیکلرارا سوزلشوولر اوچون زوروانلیکلر کمه‌یتیریلیشی و ایشانچ فضاسی ایجاد ایتیلیشی نی اونملی دیب کوپه‌یتیریشیچه، اوشبو نهاد بونده‌ی سوزلشوولردن حمایت قیله‌دی.
افغانستان‌لیکلرارا سوزلشوولر بوگون (یکشنبه ۲۶- اسد) قطر پایتختی دوحه شهریده یولگه قوییلیشی گه قرار قیلنیگن ایدی، بیراق اوتگن کون افغانستان دولتی نینگ مذاکره قیلووچی هیأتی سلام‌وطندار بیلن اوتکزگن صحبتیده، نابیللی دلیل‌لر باعث بو سوزلشوولر آرتده قالدیریلگنیدن خبر بیردی.
بیراق تینچلیک بوییچه دولت وزیرلیگی نینگ ایتیشیچه، بوندن آلدین افغانستان‌لیکلرارا سوزلشوولر باشله‌نیشی اوچون میدیالر تامانیدن ترقه‌تیلگن تاریخ، هیچ بیر رسمی نهاد آرقه‌لی اعلام قیلینمه‌گن.
تینچلیک بوییچه دولت وزیرلیگی سوزلاوچیسی ناجیه انوری نینگ سلام‌وطندارگه ایتیشیچه، حکومت افغانستان‌لیکلرارا سوزلشوولر باشله‌نیشی اوچون بوتون تیارگرلیگی بار و حاضر سوزلشوولرنینگ یولگه قوییش تاریخی تعیین ایتیلیشی اوچون بحث قیلماقده‌لر.
خانم انوری نینگ کوپه‌یتیریشیچه، قالگن محبوس‌لرنینگ حقوقی و تخنیکی ایشلری نینگ تیکشیرووی نی دوامی بار و شونینگدیک بو گروه نینگ باشقه ۳۲۰ محبوسی قوییب یوباریله‌دی.
عین حالده فرانسه مملکتی افغانستان حکومتی‌دن، بو مملکت یشاوچی‌لری نینگ هلاک ایتیلیشی گه سبب بولگن طالبان محبوسی نینگ قوییب یوباریلمه‌سینی سوره‌گن.
کابل بوییچه فرانسه ایلچی‌خانه‌سی توییتر صحیفه‌سیده، افغانستان حکومتی‌دن بو مملکت نینگ یشاوچی‌لری اینیقسه عسکرلر و یاردمچی ایشلاوچیلرنینگ هلاک ایتیلیشی گه عیبلنگن قطار تروروچیلرنینگ قوییب یوباریلیشی توغریسیده اقدام قیلمه‌یشی نی سوره‌گن.
قطار میدیالرنینگ گزارشی اساسیده، میلادی ۲۰۰۱- ییل دن ۲۰۱۹- ییل گچه ۸۶ فرانسه‌لیک عسکر افغانستان ده هلاک ایتیلگن.
