مملکت غربیده ۲۰۷ ظفر قول اردو قومندانی نینگ ایتیشیچه، حاضر طالبان غرب حوزه‌سی نینگ ۴ ولایتیده زوروانلیککه قول اورگن، بیراق اردو کوچلر مدافعه وضعیتیده قرار تاپگن.
۲۰۷ ظفر قول اردو قومندانی عبدالرووف ارغندیوال امنیتی و مدافعه کوچلردن حمایت قیلیش اوچون مذکور قول اردو قرارگاهی گه «مینینگ عسکریم مینینگ قهرمانیم» نامی آستیده یولگه قوییلگن برنامه‌ده ایتیشیچه، تینچلیک سوزلشوولری توغریسیده سعی و حرکت باشلنگن بیرحالده، بو حوزه ده اردو کوچلری طالبان گه قرشی هجوم گه باشلمه‌گن و اولر مدافعه وضعیت گه قرار تاپگن.
بیراق اونینگ کوپه‌یتیریشیچه، طالبان حاضر هرات، فراه، بادغیس و غور ولایت‌لریده حربی کوچلر و تینچ‌اهالی گه قرشی هر قنده‌ی زوروانلیککه قول اوره‌دی.
مذکور قول اردو قومندانی نینگ اورغولشیچه، طالبان بوندن آرتیق زوروانلیککه قول اورگن صورتده، اهالی طالبان گه قرشی آغیر اوروش گه شاهد بولیشی ممکن.
ارغندیوال نینگ ایتیشیچه، حاضر ۲ مینگ دن آرتیق عسکر ظفر قول اردوسیده کماندو تعلیماتی نینگ آلیش بیلن شغللنگن و طالبان افغانستان نینگ تینچلیک طلب ایسته‌کلریگه دقت قیلمه‌گن صورتده نابود بولیشی ممکن.
۲۰۷ ظفر قول اردو قومندانی اهالی گه ایشانچ بیریب ایتیشیچه، اردو کوچلری هیچ قچان طالبان تیزیمی برابریده قورال‌لرینی ییرگه قویمه‌یدی.
مذکور برنامه نی یولگه قویگن‌لردن بیری حسن وفا نینگ سلام‌وطندارگه ایتیشیچه، تاریخ ده افغانستان اردوسی ۶ مرته نابود بولگن، بیراق حاضر اهالی اینیقسه ییگیتلر و فرهنگیلر حمایتی برنامه‌لرنی یولگه قوییش بیلن افغانستان اردوسی ۷- مرته نابود بولیشی نی ایستمه‌یدیلر.
اوشبو برنامه گه قتنشگن ییگیتلر و فرهنگیلر نینگ ایتیش‌لریچه، امنیتی و مدافعه کوچلرنی هیچ قچان یالغیز قویمه‌یدیلر.
شونینگدیک مذکور ییگیتلر طالبان دن اوروش‌دن قول تارتیب و تینچلیک قیلیش‌لرینی سوره‌شگن.
مذکور بیاناتلر ارایه ایتیلگن بیرحالده، سونگی پیت‌لرده قطرده طالبان سیاسی دفتری سوزلاوچیسی نینگ رسانه‌لرگه ایتیشیچه، افغانستان اردوسیگه اوزگریش کیلیشی کیره‌ک.
