بوگون «شنبه» قیشلاقلرنی رواجلنتیریش وزیرلیگی، بیرقطاری خصوصی شرکتلر بیلن 519 میلیون افغانی ارزشلی 8 یول قوریش پروژه شرطنامهسیگه قول قویدی.
اوشبو شرطنامهلرگه قول قوییش چاغیده قیشلاقلرنی رواجلنتیریش وزیری نصیراحمد درانینینگ ایتیشیچه، مذکور 8 پروژه قیشلاقلرده یول قوریش ملی بیرنامهنینگ بیر قسمی بولگن و بونگه 29 کیلومتر یولگه قیر توکیش، 24.5 کیلومتر یولنی قیته قوریب و جغل توکیش و شونینگدیک، بغلان، لوگر، سرپل، خوست، سمنگان، کاپیسا، ننگرهار و بامیان ولایتلریده 105 متر کوپریک قوریشدن عبارت.
جناب درانیگه کوره، اوشبو پروژهلر عملگه آشیریلگنده، محل یشاوچیلری اوچون کمیده 206500 کون ایش ایجاد ایتیلهدی و خرجتی حکومتنینگ رواجلنتیریش بودجهسیدن توللنهدی.
شونینگدیک، قیشلاقلرنی رواجلنتیریش وزیرلیگی تامانیدن ترقهتیلگن خبرنامهده ایتیلیشیچه، قیشلاقلرده یول قوریش ملی برنامه جاری ییلده چمهسی 7055 کیلومتر جاده و 1691 متر کوپریک قوریشنی نظرگه آلگن.
قیشلاقلرده یول قوریش ملی برنامه حاضرگچه مملکت بویلب 6500 کیلومتر جاده و 5 مینگ متر کوپریک قورگن.
