افغانستان جمهورلیک سراییده حکومت ییریک رسمیلری و افغانستانگه یاردم بیرهدیگن مملکتلر نمایندهلرینینگ اشتراکیده اداری فسادگه قرشی کورهش خصوصیده، اروپا بیرلشمهسینینگ ییللیک اوچینچی ییغینی یولگه قوییلدی.
بوگون «دوشنبه» اوشبو ییغینده نطق سوزلهگن مملکت جمهور رییسی محمد اشرف غنی، اجراییه ریاستی تامانیدن تانیشتیریلگن قطار وزیرلرنی فساد و قومگرالیککه عیبلب ایتیشیچه، مملکت ایچکی ایشلر وزیرلیگی فساد یورهگی و تشقی ایشلر وزیرلیگیدهگی تعییناتلر قوم اساسیده عملگه آشیریلهدی.
عین حالده، سیلاولر ایرکین کمیسیونینینگ باشلیغی یوسف نورستانی، مملکت سابق مدافعه وزیری عبدالله حبیبی و باشقه بیرقطار بلند مرتبهلی رسمیلر، فسادگه عیبلنگنلریدن کیین، مملکتدن تشقری جمهور رییس تامانیدن افغانستاننینگ سیاسی نمایندهلری صفتیده تانیشتیریلگنلر.
جناب غنی، سوزلری جریانیده مالیه وزیرلیگی و تدارکات ادارهسینینگ ایشلریدن آلقیشلب ایتیشیچه، حاضرگچه 900 شرطنامه تدارکات ادارهسی تامانیدن تیکشیریلگن و 200 میلیون دالر فساد دن چیقاریلگن.
مذکور ییغینگه میزبانلیک قیلگن افغانستان بوییچه اروپا بیرلشمهسینینگ نمایندهسی فرانس مایکل ملیبننینگ ایتیشیچه، افغانستانده فساد آلدی آلینیب و یشاوچیلر عدالتگه قول تاپیشلری کیرهک. اونینگ ایتیشیچه، فسادچی کیشیلر، فسادگه قرشی کورهش لایحه برابریده توسیق ایجاد ایتیش اوچون سعی و حرکت قیلهدیلر.
شونینگدیک، اوشبو ییغینده سوزگه چیققن جمهور رییسنینگ ایکینچی اورین باسری سرور دانش، یخشی حکومتدارلیک برابریدهگی اساسی قیینچیلیک اداری فساد دیب ایتیشیچه، حکومت فسادگه قرشی جدی کورهشنی باشلهگن.
بیراق، جناب دانشنینگ ایتیشیچه، فسادگه قرشی کورهش اوچون آچیق لایحه یوق دیر و ایریم حکومتی ادارهلرده جمهور رییسنینگ بویروغلری عملگه آشیریلمهیدی.
حکومت ییریک رسمیلری، افغانستان دنیا بوییچه فاسد دولتلردن بیری صفتیده تانیلگن بیرچاغیده، اداری فسادگه قرشی جدی کورهشنی بیلدیرهدی و فسادگه قرشی کورهش خصوصیده، حکومت باشلیغلرینینگ سوزلری، اونچهلیک عملگه آشیریلمهگن.