افغانستان ایچکی ایشلر وزیرلیگی، اوشبو وزیرلیکنینگ اوچ سابق معینی مجتبا پتنگ، جمیل جنبش و جمالناصر صدیقی سیاحتدن بند ایتیلگنیدن خبر بیرگن. ایچکی ایشلر وزیرلیگی سوزلاوچیسی صدیق صدیقینینگ سلاموطندارگه ایتیشیچه، جمهور رییس، اوشبو وزیرلیکنینگ نیچه دوسیهسینی تیکشیرگنیدن کیین، اوچ سابق معین سیاحتدن بند ایتیلیشیگه حکم صادر قیلیب و اولرنی باش قارهلاوچیلیککه تانیشتیرگن.
جناب صدیقیگه کوره، مذکور اوچ کیشی، 1391- ییلدن 1394- ییلگهقدر، ایچکی ایشلر وزیرلیگینینگ نظمعامه معینی ایکنلر.
مجتبا پتنک، بو حکم توغریسیده سلاموطندار بیلن صحبت اوتکزمهگن و جمیل جنبش بیلن جمالناصر صدیقینینگ فکرلرینی اورگهنیش خصوصیده قیلگن سعی و حرکتمیز نتیجهسیز قالدی.
شونینگدیک ایتیلیشیچه، مذکور وزیرلیکنینگ نظمعامه معینیتی تدارکات بولیمی ایشچیلرینینگ وظیفهسی جمهور رییس تامانیدن صادر ایتیلگن حکم اساسیده، توختهتیلگن.
جمهور رییسنینگ بیش مادهلیک حکمی اساسیده، «ملی پولیس اوچون یخشی انشاعاتگه ییترلیچه اصلاحات کیریتیلیشی، تنیقلیک، قانون حاکمیتی و ایچکی ایشلر وزیرلیگیگه تیگیشلی ادارهلرده اداری فساد آلدی آلینیشی» اوچون ایچکی ایشلر وزیرلیگی تأمینات معینیتیگه تیگیشلی برچه بستلر ملکی بولهدی.
اوشبو حکمنینگ بیرینچی مادهسیده کیلیشیچه، «اوتگن اون ییلده تدارکات بولیمیده ایشلهگن ایشچیلر، ایشدن آلینیب و ایرکین بیلشوو اساسیده، صادق، متخصص و ظرفیتلی کیشیلر، بستلرده تعیین ایتیلهدی.»
شونینگدیک، صادر ایتیلگن حکمنینگ تورتینچی مادهسیده کیلیشیچه، نظمعامه معینیتی تدارکاتگه تیگیشلی ایشلر، ایچکی ایشلر وزیرلیگینینگ تأمینات معینیتی تامانیدن عملگه آشیریلهدی.
اوشبو حکمنینگ بیشینچی مادهسی اساسیده، 1391- ییلدن 1394- ییللر جریانیده ایچکی ایشلر وزیرلیگینینگ نظمعامه و تدارکات معینیتلرینینگ ایشلریگه ساختهکارلیک قیلگن شرکتلر هم تدارکات ملی ادارهسیگه تانیشتیریلهدی.
