بغلان بیلیم یورتی نینگ طلبهلری، ولایتدهگی نابرقرارلیک و تینچسیزلیکلر سبب تحصیلدن قالگنلیکلرینی ایتگنلر. کوپچلیگی مهندسلیک، اقتصاد، ایکینچلیک، تعلیم و تربیه و ژورنالیست فاکولتهسی نینگ محصلی بولگن یاشلر « تحصیل اوچون حیاتیمیزنی خطرگه روپه ره قیلمیمیز» دیگنلر.
عمومی سانی یوزدن آرتیق بولگن اوشبو محصللر، فاکولتهلری نینگ بناسی پلخمری شهری نینگ حسینخیل و زمانخیل منطقهسیده بولگن لیگی اوچون باره آلمسلیکنی تیلگه آلگنلر. ایتیلیشیچه، مذکور منطقه نیچه مرته ملی کوچلر بیلن طالبلر اورتهسیده قولمه قول بولگن.
محصللرنینگ بو قیینچیلیگینی تصدیق ایتگن ولایت عالی تحصیلات موسسهسی نینگ باشلیغی خلیلاحمد کانجو، حاضرگی کونده نابرقرارلیکلرنینگ بیر مونچهسی ملی کوچلر همکارلیگی بیلن حل ایتیلگن دیگن. اما، شهرنینگ حسینخیل منطقهسیده جایلشگن بیلیم یورت نینگ بیش فاکولتهسی بعضن محصللرنی جدی خواطریگه سبب بولهدی دیگن جناب کانجو.
بغلان افغانستان شمالیدهگی ناتینچ ولایتلردن حسابلنهدی. قندوز ایکینچی بار دولت قوراللی مخالفلری قولیگه اوتگندن سونگ بو ولایتده نابرقرارلیکلر ینه اوج آلدی. شونینگدیک شهر ایچیدهگی خانهدانلر ایریم پیتلرده ملی کوچلر بیلن جنگری طالبلر اورتهسیده یوز بیره دیگن اوروشنینگ آوازی ایشیتیلیشینی اظهار قیلگنلر.
