افغانستان جمهور رییسی نینگ بیرینچی اورین باسری عبدالرشید دوستم نینگ جمهور رییس‌غنی و اجراییه باشلیغی عبدالله‌عبدالله نی تنقید آستیگه آلگن لیگی سیاستچیلر، اجتماعی ترماقلر ینه عادی خلق نینگ عکس‌العملی‌گه روپه‌ره بولدی.
جمهور رییس نینگ بیرینچی اورین باسری اوتگن هفته قیلگن اظهاراتلریده جمهور رییس‌غنی و اجراییه باشلیغی عبدالله‌عبدالله نی قوم‌پرستلیک‌که عیبدار بیلگن ایدی.
نویویارک تایمیز کونده‌لیگی، جنرال عبدالرشید دستم اوزیگه حرمت کورستیلمه‌گن حالده و طرفدارلریگه حکومت‌گه حصه بیریلمه‌گن تقدیرده، افغانستان بحرانگه روپه‌ره بولیشی باره‌سیده آگاهلنتیرگن دیگن.
جناب دوستم‌نینگ سونگی تیلگه آلگن موضوعلریگه اشاره قیلگن بیر قنچه سیاسی تحلیلچیلر، اونینگ اخیرگی اظهاراتی حکومت‌نی آگالنتیریش ایمس، اما بیر قنچه تحلیلچیلر ایسه اونینگ سوزلری حکومت‌نی آگالنتیریش دیگنلر.
سیاسی تحلیلچی محب‌الله شریف، جنرال دوستم نینگ سونگی اظهاراتلری حکومت نینگ کلیدی نفری و موقعی‌گه قره‌گنده درست ایمس دیگن. اونینگ سوزلریگه کوره، جنرال دوستم نینگ تنقیدلریگه قره‌گنده افغانستانلیک سیاستچیلر هنوزگچه سیاسی پیشیقلیک‌که ایریشمه‌گن لیکلریدن درک بیره‌دی.
جناب شریف، جمهور رییس بیرینچی اورین باسری نینگ تیلگه آلگن سوزلری ملی منفعتلرگه قرشی دیدی.
باشقه بیر سیاسی تحلیلچی جاوید غفور، جنرال دوستم سونگی اظهارتلرنی تیلگه آلیش بیلن جمهور رییس‌دن کوپراق امتیاز آلیش اوچون سعی وحرکت قیله‌دی دیگن.
اما، ینه بیر سیاسی تحلیلچی سردارمحمد رحمان اوغلی، جنرال دوستم اهالی تامانیدن باسیم آستیگه آلینگن و جمهور رییس‌غنی ایسه اورین باسریلری بیلن بولگن قرمه – قرشیلیکلرگه پایان بیریب، 15 ییل جریانیده قولگه کیریتیلگن یوتوقلر سقله‌نیشینی انابتگه آلیشی کیره‌ک دیگن.
جناب رحمان اوغلی نینگ سوزلریگه کوره، جنرال دوستم نینگ حکومت‌گه اورنی اثباتله‌نیب قدرت بولینیش‌ده اونگه سهم بیریلیشی لازم.
عین حالده، جمهور رییس نینگ ایکینچی اورین باسری سرور دانش و اجراییه ریاستی باشلیغی عبدالله‌عبدالله جنرال دوستم نینگ اخیرگی اظهاراتلرینی ملی منفعتلرگه قرشی دیگنلر.
شونینگدیک نماینده‌لر مجلسی نینگ بیر قنچه اعضالری هم بیرینچی معاون نینگ سوزلری ملی منفعتلرگه ضد دیگن ایدیلر.
