.jpg)
افغانستان جمهور رییسی محمد اشرف غنی و گلبدین حکمتیارلر حزب اسلامی بیلن دولت اورتهسیده کیلیشیلگن تینچلیک شرطنامهسیگه امضا چیکدیلر. نا معلوم سببلرگه کوره گلبدین حکمتیار مذکور شرطنامهنی امضا قیلیش اوچون کابلگه کیلمهدی. بلکه پنجشنبه کونی جمهور رییسلیک سراییده اونلب کیشی سیاستچیلر، حکمتیار طرفدارلری و دولت بلند مرتبهلی رسمیلری اشتراکیده اوتکزیلگن ییغینده حکمتیارنی تینچلیک مسالهسی گه بغیشلب سوزله گن نطقی نینگ ویدیوسی کورسه تیلدی. ویدیو سونگیده حکمتیارنی تینچلیک شرطنامهسی نینگ اوچ نسخهسیگه امضا چیکنی نمایش ایتیلدی.
گلبدین حکمتیار اوز نطقیده مملکتده تینچلیک تامینلنیشی ضرورتی اوستیده توختهلیب، جنگری طالبلر و باشقه قوراللی گروهلرنی جنگ قیلمس لیککه و دولت بیلن صلح ایتیشلیککه دعوت ایتدی. حکمتیار، افغانستانده 99% افغانلر اولیمیگه باعث بوله دیگن اوروشنی نا روا بیر جنگ بولگنینی تاکیدلهدی.
افغانستان جمهور رییسی محمد اشرف غنی هم اوز نطقیده ینه بیر مرته طالبلرنی اوز مشکللرینی سیاسی یوللر آرقهلی برطرف ایتیشلیککه دعوت ایتیب، مملکتده تینلچیکنی تامینلش یولیده اوز جانینی قربان قیلیش لیککه هم تیار ایکنینی بیلدیردی. جناب غنی اوز صحبتلری سونگیده گلبدین حکمتیار امضا چیککن تینچلیک بیتیمی نینگ اوچله نسخهسیگه هم امضا قیلدی. در واقع غنی و حکمتیار امضا چیکیشی بیلن دولت بیلن حزب اسلامی اورتهسیدهگی تینچلیک شرطلری کوچگه کیریتیلدی. دولتگه تیگیشلی منبعلر مذکور بیتیمنی کیلهسی هفته دن باشلب اجرا ایتیلیشی و گلبدین حکمتیارنی کابلگه کیلیشی اوچون شرایط یره تیلیشی نی ایته دیلر.
.jpg)
شرطنامه نینگ قارانغی تامانی
افغانستان دولتی بیلن حزب اسلامی اورتهسیده امضالنگن بیتیم ده مذکور حزب نینگ قوراللی جنگچیلری موقعی اینیقسه اولر نینگ قولیدهگی قورال – اسلحهلر تقدیری بارهسیده ایضاح بیریلمهگن. معلوم که حزب اسلامی جهاد ییللریده سان سناقسیز قورال – ییراقلرگه ایگه بولگن ایدی. 14 ییل لیک جهاد دوریده مجاهد گروهلرنی حمایت ایتووچی چیت ایللیک دولتلر جمله دن غرب و عرب مملکتلری تامانیدن مجاهد گروه لر گه کورستیله دیگن حربی و مالیوی کومکلرنینگ اینگ کته قسمی گلبدین حکمتیار رهبرلیگیدهگی حزب اسلامی جنگریلریگه ییتکزیب بیریلردی.
خلاصه قیلیب ایتگنده، افغانستان نینگ اسلامی کوزقره شده گی اشدی گروه لری اورتهسیده تیش تیرناغی بیلن قوراللنگن گروه همانا حزب اسلامی ایدی. گرچه حزب اسلامی 1371 ییلدن سونگ ایچکی نزاعلر ییللری جریانیده و اوندن سونگ طالبلر حاکمیتی دوریده اوز حربی امکانلری بیر مقدارینی قولدن بیردی. مذکور حرکتگه وفادار جنگریلرنینگ بیر قسمی طالبلر صفلریگه قوشیلگنی هیچ کیم گه سر ایمس البته. «بوری نینگ اویی سویکسیز بولمهیدی» دیگن لریدیک حزب اسلامی بوکونگه قدر هم حربی گروه صفتیده جنگ قیلیب کیلدی. و اونینگ اختیاریده گی قورال – ییراقلر سانی آز ایمس.
افغانستان دولتی بیلن حزب اسلامی ارا امضالنگن تینچلیک بیتیمی کوچ گه کیریتیلیشی بیلن اوشبو حرکت آتش کیسین اعلان ایتهدی. بو آره ده حزب نینگ قولیدهگی قورال – اسلحهلری بارهسیده دولت بیلن حزب اسلامی اورتهسیده دستخط قیلینگن شرطنامه ده بیران نرسه دییلمهگن. 2002 ییلده طالبلر حاکمیتی قولهتیلگنیدن سونگ بُن بیتیمی اساسیده افغانستان حکومتی ترکیبی گه کیرگن ایریم قوراللی گروهلر حربی یراقلری "دی. دی. آر"و "دایاگ" برنامهلری اساسیده دولتگه تاپشیریلگن ایدی.
بو ییرده ینه ایریم سواللر اوز اوزیدن توغیلیشی طبیعی بیر حال. بیرینچیدن حزب اسلامی جنگریلری مملکت نینگ قیسی حدودلریده فعالیت آلیب باره دیلر و نیچه قیشلاق و منطقه ده نظارت اورنتگنلر؟ اولر بیلن دولت اورتهسیده آتش کیسین عملگه آشیریلگن تقدیرده قیسی منطقهلرده تینچلیک تامینلنیب، دولت برنامهلری تطبیق ایتیله باشلهیدی؟ حزب اسلامی نینگ فعال جنگریلری سانی نیچهگه ییتهدی؟
دولت و حزب اسلامی بلند مرتبهلی رسمیلری همده افغانستان تینچلیک عالی کینگشی باشلیغلری بو توغریده معلومات بیریشلری ضرور.
تینچلیک بیتیمینی امضالب دولت بیلن همکارلیککه باشلهگن هر قنده ی حربی گروه نی اوز قورال – اسلحهلرینی دولتگه تاپشیریشی تینچلیک تامینلشی نینگ اساسی و منطقلی شرطلریدن سنهلهدی. چنان که یقینده لاتین امریکا نینگ بولیوی مملکتیده دولت بیلن "فارک" جنگریلری ارا تینچلیک بیتیمی امضالندی. اوشبو شرطنامه اساسیده "فارک" حربی گروهی 180 کون ایچیده اوز قورال اسلحهلرینی بیرلشگن ملتلر تشکیلاتیگه تاپشیریب اوز سیاسی فعالیتلرینی مملکتلری نینگ اساسی قانونیگه مطابق دوام ایتدیره دیلر.
گلبدین حکمتیار نینگ موجود وضعیتده دولتگه قرشی جنگنی توختهتیب دولت بیلن قیسی بیر معناده همکار بولیشیدن قندهی مقصدلرنی کوزلهگن بولیشی ممکن؟ بو سوراو نینگ ایکی قرهمه قرشی جوابی بار. بیرینچیسی حکمتیار اوزاق ییللر اوزولوکسیز حربی فعالیتلریدن کوتیلگن نتیجهلر آلمهی عمری نینگ آخریده جنگلردن چرچب بوندهی بیر قرارنی قبول قیلیش لیککه مجبور بولگن بولیشی ممکن. ایکینچی جواب ایسه اونی خارجی استخبارات اینیقسه پاکستان نینگ جاسوسلیک ارگانلری اشارهسی بیلن دولت ایچکریسیگه کیریب آلیب، وقتی کیلگنده بیشینچی ستون رولینی اوینش مقصدیده بوندهی بیر عملگه قول اورگن بولیشی هم احتمالدن ییراقده ایمس.
حکمتیارنینگ تینچیلیک بیتیمینی امضالب دولتگه کومکچی بولیشی نینگ اوزی یامان ایمس البته. بو عمل باشقه جنگری گروهلرنی تینچلیک جریانی گه قوشیلیش لریگه یول آچیب بیرهدی. هر حالده بو آره ده دولتنینگ تیگیشلی ارگانلری و وطنسیور افغان سیاستچیلرنی یوقاریده بیلدیریلگن سواللر توغریسیده هشیار بولیشلری ینه اوزیگه خاص اهمیت تاپهدی.
