اوچ کوندن بویان جوزجان ولایتیده داعش گروهی پیدا بولیب امنیتی کوچلر بیلن اوروش ماقده دیگن گزارشلر ترقهتیلیب کیلماقده. داعش گروهی ایلکبار اوشبو ولایتدن باش کوتریشینی کورستهدی. بوندن آلدین مذکور گروه فعالیتی ننگرهار ولایتیده چیکلنگن ایدی.
جوزجان ولایتی کینگش اعضاسی نینگ معلوم قیلیشیچه، داعش گروهی مذکور ولایتده ینگی بیر پدیده بولگن و شو حاضر دولت بو گروه آلدینی آلیب نابود قیلمهگن صورتده، جوزجان ولایتی هم ننگرهار ولایتی نینگ کوت و اچین تومنلری دیک ناتینچ بولیشی ممکن.
حلیمه صدف نینگ معلوم ایتیشیچه، جنگری طالبان رهبرلریدن بیر قتاری داعش گروهیگه قوشیلیب و اولربیلن عصیانچی عمللرنی شدت لنتیرگن.
اونگه کوره، فاریاب، سرپل ولایتلریدن جنگریلر جوزجانده کیلیب داعش نامی بیلن گروهی شکلیده جوزجاننی ناتینچ قیلماقدهلر.
جوزجان والیسی نینگ سوزلاوچیسی محمد رضا غفوری، جوزجانده داعش نینگ فعالیتی تأیید قیلهدی و ایتیشیچه: «داعش گروهی اونچهلیک هم خوفلی ایمس.» غفوریگه کوره «اوتگن کونگی طالبلر بوگونکی داعش بولگن»
والی سوزلاوچیسی نینگ معلوم قیلیشیچه، داعش گروهی جوزجانده اوزیگه عسکر آلیش ایشینی باشلهگن و ایتیشیچه، حکومت تیزلیکده بو گروه آلدینی آلیشگه حرکت قیلمهگن تقدیرده، وضعیت یمانلشیگه سبب بولیشی ممکن.
مذکور گروه نینگ اوچ کوندن بویان قوشتیپه تومنیده هجومی نتیجهسیده 50 که یقین داعش نفرلری هلاکتگه بیریلگن.
جوزجان ولایت پولیس باشلیغی، عبدالحفیظ خاشع نینگ سلاموطندارگه بیلدیریشیچه، جوزجان ولایتیده قاری حکمت ناملی شخص سونگی کونلرده داعش گروهیگه قوشیلگن قوشتپه تومنی نینگ قورشاوگه آلیشگه کتته حصه قوشگن.
ننگرهار ولایتی نینگ اچین و کوت تومنی داعش گروهی اصلی مرکزیگه ایلنگن. تحلیلچیلرگه کوره، افغانستانده داعش دیگن گروه ایلدیزدن یوق بولگن و داعش نامیده فعالیت قیلهدیلر و فقط بیراغلریگه فرق کیلتیرگنلر.
