سونگی کونلرده افغانستان‌ده راکت‌گه قرشی سیستم اورنه‌تیش قراری توغری‌سیده مِش‌مِش‌لر کوپه‌یگن.
ایش بیلرمانلرنینگ ایتیشیچه، مذکور سیستم اورنه‌تیلگن تقدیرده، قوشنی مملکت‌لرنی قورقیتیب و افغانستان اوروشی‌نی چوزه‌دی. اولرگه کوره، راکت‌گه قرشی سیستم اورنه‌تیلگن صورتده، افغانستان ینه منطقه‌ده طرف‌سیز قالمه‌یدی و قوشنی مملکت‌لرنینگ حرکتی اوزگره‌دی. بیراق باشقه بیرقطارلر، اوشبو موضوع توغری‌سیده باشقچه توشینه‌دی.
سیاسی ایش بیلرمان محمود حیدری‌نینگ سلام‌وطندارگه ایتیشیچه، پروان ولایتی‌نینگ صافی تاغی اوشبو سیستم اورنه‌تیلیشی اوچون تعیین ایتیلگن و شو مسئله توغری‌سیده تیارگرلیک‌لر باشلنگن. حیدری‌گه کوره، بو سیستم اورنه‌تیلگن صورتده، منطقه مملکت‌لری اینیقسه چین، ایران و روسیه حرکتی اوزگریشی ممکن و احتمال باریچه افغانستانده‌گی نیابتی اوروش چوزیله‌دی. نتیجه‌ده افغانستان اوروشی کیله‌جک نیچه ییل‌گچه دوام ایته‌دی.
سیاسی ایش بیلرمانلردن باشقه بیری کابل‌خان تدبیرگه کوره، راکت‌گه قرشی سیستم اورنه‌تیلگن‌ده دفاعی و مملکت منفعتی‌گه بولیشی ممکن. جناب تدبیرگه کوره، اوشبو سیستم اورنه‌تیلگنی‌دن کیین، احتمال باریچه افغانستان اوروشی چوزیله‌دی. بیراق اوشبو سیستم مملکت‌ده داعش قدرتی کوپه‌ییشی‌گه توسیق بوله‌دی و افغانستان‌نی سوریه تقدیری‌گه روپه‌ره بولگنی قویمه‌یدی.
شونینگ‌دیک، ایش بیلرمانلردن باشقه بیری اسحاق اتمر، مذکور سیستم اورنه‌تیلیشی‌نی مملکت منفعتی‌گه بیلیب ایتیشیچه، افغانستان برچه قوشنی‌لری اتمی و باشقه عامه‌وی قیرغین قیله‌دیگن قورال‌گه ایگه بولیب تورگن بیر وضعیت‌گه قرار تاپگن و راکت‌گه قرشی سیستم اورنه‌تیلیشی مدافعه‌وی قلقان شکلده کیله‌جک‌ده احتمالی زیان‌لرنی باشقریشی ممکن.
ملی مدافعه وزیرلیگی سوزلاوچیسی‌نینگ فکرینی اورگه‌نیش اوچون آلیب بارگن حرکت‌میز نتیجه بیرمه‌دی.
