افغانستان غربی‌ده جایلشگن هرات ولایتی‌نینگ اطراف محیطنی تازه سقلش اداره‌سی مسوول‌لری، ولایت‌نینگ بیر قنچه تومنلریده توغمه قوشلر و حیوانلر شفقت‌سیز روش‌ده آوله‌نیشی بو تور حیوان‌لرنینگ نسلی نابود بولیش‌گه یوز توتگن دیگن‌لر.
هرات اطراف محیطنی تازه سقلش اداره‌سی‌نینگ باشلیغی نصیراحمد فضلی، قوشلر و حیوانلر آوله‌نیشی‌دن علاوه کَم‌اوچره‌یدیگن اوسیملیک‌لر اوز باشیمچه کیسیلیشی باره‌سیده هم تشویش بیلدیرگن.
هرات یشش محیطنی تازه سقلش اداره‌سی، ایریم حیوانلر جلمه‌دن کییک، تاوشقان، بوری ینه توغمه قوشلر جلمه‌دن مینا، طوطی و سارمیناکبی قوشلر ولایت‌نینگ کهسان، کشک رباط‌سنگی، غوریان، شیندند و ادرسکن کبی نا برقرار تومنلریده محل یشاووچی‌لری تامانیدن آوله‌نیشی‌نی بیلدیرگن.
شونینگ‌دیک هرات ولایتی‌نینگ یشاووچی‌لری، حیوانلر اینیقسه مینا و سارمینا قوش‌لری محل تامانیدن آوله‌نیب مملکت‌دن تشقریگه قاچاق ایتیله‌دی دیگن‌لر.
اما، ولایت والیسی‌نینگ سوزلاووچی‌سی جیلانی فرهاد، حیوانلر و قوشلرنی آولش تعقیق‌لنگن لیگینی ایتگن. اونگه کوره، ولایت‌نینگ محلی اداره‌لری، حیوانلر و قوشلرنی قاچاق قیله‌دیگن‌لر بیلن جدی یانده‌شه‌دی.
اطراف محیط ایش‌لری بوییچه متخصص وکیل احمد بارک، هرات ولایتی‌نینگ نابرقرار منطقه‌لریده کوپراق حیوانلر و قوشلر آوله‌نه‌دی دیگن.
هرات اطراف محیطنی تازه سقلش اداره‌سی‌نینگ مسوول‌لری، هر ییلی عرب دولت‌لریدن بیر قطار آوچی‌لر مملکت‌نینگ غرب زونی‌گه حیوانلر همده قوشلرنی آولش‌گه کیله دیگن بیر پیت‌ده بو توغریده تشویش بیلدیرگن‌لر.
