بغلان ولایتی محلی رسمیلرینینگ ایتیشیچه، مذکور ولایت دندغوری منطقهسیده اوتکزیلگن «20 خورشید» عملیاتی جریانیده 81 جنگری طالب هلاک بولگن و باشقه 30 دن آرتیق طالب یرهلنگن.
رسمیلرگه کوره، 9 کوندن بویان دوام ایتیب کیلهیاتگن عملیاتده هلاک بولگنلر و یرهلنگنلر ایچیده، جنگری طالبلرنینگ اوچ تانیقلی قومندانی آدم ییگیچ آتیده شهرت قازانگن پهلوان، نازکمیر و حاجی محمد شامل پاکستانلیکلر هم کورینهدی.
بغلان ولایتی دندغوری منطقهسیده، «20 خورشید» ناملی عملیات 9 کون آلدین باشلندی. حکومت رسمیلریگه کوره، جنگری طالبلر بیلن امنیتی کوچلر توقنهشوو جریانیده، قوراللی طالبلر دندشهابالدین منطقهسیده برق پایهلریدن بیرینی پارتلهتگن.
گزارشلر اساسیده، اوشبو گروه جنگریلری ایکی کون آلدین هم، مذکور منطقهده برق پایهلریدن بیرینی ییقیتگن.
اوتگن (چهارشنبه کون) بغلان والیسی عبدالستار بارزنینگ بیر خبری ییغینده ایتیشیچه، امنیتی کوچلر دندغوریده قوراللی طالبلرنی قورشاوگه آلگن؛ بیراق جنگری طالبلر محل یشاوچیلرینینگ اویلریده سنگر آلگنی باعث، امنیتی کوچلر تینچ اهالی تلفاتی باشقریلیشی خصوصیده، احتیاط بیلن آلغه بارماقده.
شونینگدیک، جناب بارزنینگ ایتیشیچه، محل یشاوچیلری امنیتی کوچلردن حمایت قیلیب و اولردن بیرقطاری، خلق کوچلری صفیده، طالبلرگه قرشی اوروشهدی.
عین حالده، بغلان مدنی فعاللریدن بیرقطاری، جاری اوروشده تینچ اهالی تلفاتی کوپهیگنی توغریسیده خواطر بیلدیریب ایتیشیچه، دندغوری عملیاتی جریانیده اونلرچه تینچ اهالی اولیب و یرهلنگن.
بغلان فعال عیاللریدن بیری نادره نهرینوالنینگ سلاموطندارگه ایتیشیچه، اوشبو عملیات جریانیده یرهلنگنلرنینگ کوپینچهسی بالهلر و عیاللر دیر.
خانم نهرینوال نینگ ایتیشیچه، دندغوری طالبلری بیلن کیلیشووگه قول قوییلگنیدن کیین، اوشبو گروه بو منطقهده قرارگاه توزهتگن و افغانستان دولتی یالغیزلیکده بو قرارگاهلرنی تازهلهآلمهیدی. اونینگ کوپهیتیریشیچه، دولت، جنگری طالبلرنی نابود ایتیشگه قرار قیلگن صورتده، دندغوریدهگی قرارگاهلرینی نابود ایتیش اوچون ناتو کوچلریدن یاردم سورهب ایسلنگن قرارگاهنی هوا و ییردن هدف قرار بیریشی کیرهک.
طالبلر بیلن بولگن کیلیشووگه کمیده بیش آی آلدین، چیگرهلر وزیری گلاب منگل تامانیدن قول قوییلگن و اونگه اساس، دولت، بغلان مرکزیگه یقین دندغوری منطقهسینی قوراللی طالبلرگه تاپشیرگن.
بغلان امنیتی رسمیلرینینگ ایتیشیچه، اوشبو عملیات ولایت مرکزی، دندشهابالدین و دندغوری منطقهلری بوتونلهی قوراللی طالبلردن تازهلنگونگهقدر دوام ایتهدی.
