اجملنینگ آنهسی غمگه باتیب و دردگه توشیب اولتیرگن. اوغلینینگ صورتینی بغریده باسیب یاش توکهدی. اوی فضاسی غمگه باتگن. اجملنینگ فرزندلری اوی یوزیده اوزی بیلن بولیب قالگن. غمگه باتگن یورهکلریگه تسلی بیرهدیگن آتهسی یوق دیر.
اجمل (چهارشنبه کون) کیچ قورون (30- جدی) طلوع تلویزیونینینگ ایشچیلرینی تاشیدیگن موتر اوستیگه اویوشتیریلگن هجومده هلاک بولگن.
اجملنینگ تورموش اورتاغی حاضرگچه، مذکور واقعه شوکهسیده حیات کیچیرهدی. اونگه کوره، اطرافیدهگیلر واقعه کونیدن بویان سوو ایچمهی و کوز یوممهگن. کوزلری ییرگه تیکیلیب و لال قالگن.
اجملنینگ آنهسی اوغلینینگ غمیگه قتیق ییغلب و قیغو و علمگه باتیب ایتیشیچه، مملکت برچه آنهلری اوچون دعا قیلهدی کیم، اونینگ دردیگه چالینمهی و هیچ قچان قاره توپراققه اولتیرمهسینلر.
اجملنینگ آنهسیگه کوره، اوغلی بیر عسکر ایدی و ملی کینگش اوچون قوروقچیلیک قیلردی. اونینگ ایتیشیچه، خودکش هجومچی و تروریستلرگه هیچ نرسه دیمهیدی؛ دیمک اوشبو هجوم عامللری قولگه آلینیشی و اولیمی هیچ بیر دردنی دارولهآلمهیدی. یالغیز او آلتی باش پناهسیز باله توغریسیده اویلهیدی؛ اونگه کوره، بو بالهلرنینگ تقدیری نیمه بولهدی؟ قندهی قیلیب کتهرهدی و کیم اولرنینگ دادیگه ییتیشهدی؟
اجمل بیش قیز و بیر اوغیلنینگ آتهسی ایکن. او فرزندلرینینگ آذیق و آوقتیدن باشقه اوی کراسینی تأمین قیلردی. 10 مینگ و بیش یوز افغانی آیلیک آلردی. اوچ افغانی اویگه کرا بیرردی و قالگن پولینی آینی اداغیگچه ییتکیزردی.
حربی کوچلرنی تقاعد قیلگن افسری اجملنینگ آتهسی شاه ولینینگ ایتیشیچه، افسوسلنهدی کیم، اجمل مجلس اعضالرینی قوریش اوچون جان بیرگن و مجلس اعضالریدن هیچ بیری، اونینگ عایلهسیدن خبر آلمهی و تیزلیکده اونی اورنیده باشقه کیشینی تنلهگن.
اجملنینگ آتهسی اچیقلنیب سوزلهیدی. اونگه کوره، دولت فسادگه چومیلگن. دولتچیلرنینگ مخدره ماده قاچاقی، عصیانچیلر و تروریستلردن حمایت قیلیش و کینگ مالی فسادگه قولی بار. اونگه کوره، اوشبو هجوم عامللری قندهی بیر شکلده اوزینی پایتختگه ییتکیزگن، دیمک ایلگریدن بو هجوم توغریسیده خبر هم بیریلگن ایکن.
شونینگدیک، اجملنینگ عایلهسی مملکت میدیالریدن شکایت قیلیب ایتیشیچه، میدیا ایشچیلرینینگ جانی بیر حربی عسکرینینگ جانیدن شیرین ایمس؛ بیراق مملکت میدیالری یالغیز طلوع تلویزیونینینگ ایشچیلری خصوصیده دقت قیلیب و باشقه هلاک بولگنلر و یرهلنگنلرنی ایسدن چیقارگن.
