سیلاولر ایرکین کمیسیونی مسؤوللرینینگ ایتیشیچه، آواز بیرووچیلرنینگ رویخطگه آلیش لایحه زمانی، 5- سرطان دن سونگ باشلنگن مرکزلرده قیته تیکلهنیشی ممکن.
سلاموطندارگه صحبت بیرگن سیلاولر ایرکین کمیسیونی نینگ سوزلاوچیسی و کاتبی سید حفیظ الله هاشمی نینگ ایتیشیچه، شو توغریده کمیسیون اعضالری نینگ آره سیده دستلبکی کیلیشوو یوز بیرگن؛ بیراق حاضرگچه سونگی قرار آلینمه گن. جناب هاشمی گه کوره، آواز بیرووچیلرنینگ رویخط گه آلیش لایحه عمومی شکلده تیکلنمه یدی، چونکه اوشبو لایحه قیته تیکلهنیشی سیلاو تقویمی اوستیگه تأثیر قویه دی.
جناب هاشمی نینگ ایتیشیچه، سیلاولر ایرکین کمیسیونی حربی کوچلر، کسلخانه لرنینگ ایشلاوچی لری و محبوس لر رویخط گه آلینیشی اوچون زمینه یره ته دی و بو توغریده رویخط گه آلینیش تقویم اعلان بولیشی خصوصیده، قرار قیلینگن.
سیلاولر ایرکین کمیسیونینینگ وبسایتیده نشر ایتیلگن رقم گه کوره، حاضرگچه مملکت بویلب 8 میلیون و 631 مینگ و 567 کیشی رویخط گه آلینگن. جناب هاشمی نینگ ایتیشیچه، رویخط گه آلینگنلرنینگ رقمی سیلاولر کمیسیونی کوتگن میزاندن آرتیق دیر.
افغانستانده ایرکین و عدالتلی سیلاولر ادارهسی یا-ده (فیفا) اجراییه باشلیغی یوسف رشیدنینگ ایتیشیچه، ناتینچلیک و ایشلاوچیلر تیزلیکده سیلاولر کمیسیونی تامانیدن تعیین ایتیلمهگنی باعث، مملکت نینگ ایریم منطقهلریده رویخط گه آلیش لایحه کیچ باشلندی.
جناب رشیدنینگ اورغولشیچه، سیلاولر ایرکین کمیسیونی مملکت بویلب آواز بیریش شرایطی گه ماس بوتون اشتراکچیلرگه زمینه یرهتیشی کیرهک. فیفا اجراییه باشلیغی، رویخطگه آلینگنلر توغریسیده، سیلاولر ایرکین کمیسیونینینگ رقمینی سوراقلی دییدی.
یوسف رشیدگه کوره، سیلاولر ایرکین کمیسیونی تامانیدن سیستم گه رقم کیریتیش لایحه سُستلیک بیلن ایلگری کیتهدی و بو ایش اوچون کمیسیون تامانیدن تعیین ایتیلگن ایشلاوچیلرنینگ رقمی ییترلی ایمس دیر.
فیفا اجراییه باشلیغینینگ ایتیشیچه، سیلاولر ایرکین کمیسیونی تامانیدن ترقهتیلگن رقم تلیفون و ایمیل آرقهلی توپلنگن و بو ایشانچلی ایمس دیر. جناب رشیدنینگ ایتیشیچه، سیلاولرنی نظارت قیلهدیگن ادارهلر اوچون کمیسیون ایشلریدن نظارت قیلیش قیسقرتیریلگن و بو موضوع سبب، نظارت قیلووچی ادارهلر سیلاولر کمیسیونینینگ ایشلریدن یخشی بیر شکلده معلومات قولگه کیریته آلمهیدی.
