افغانستان و پاکستان اوچون روسیه مخصوص نمایندهسینینگ سونگی اظهاراتی ملی مجلس عکسالعملیگه روپهره بولدی.
یقینده روسیهنینگ افغانستان اوچون مخصوص نمایندهسی ضمیر کابلوف، روسیه داعشگه قرشی کورهشیش اوچون قوراللی طالبلر بیلن علاقه قورگن لیگینی معلوم قیلدی. شونینگدیک افغانستانده داعش گروهی نابود ایتیلیشی اوچون طالبلر بیلن علاقه قوریلگن دیگن جناب کابلوف.
کابلوفنینگ بو سوزلری ملی مجلس اعضالری جدی عکسالعملیگه روپهره بولدی. نمایندهلر حکومتدن اوشبو مساله آلدینی آلیش اوچون سعی و حرکت قیلیشنی سورهگنلر.
شونینگدیک ملی مجلسنینگ قطار اعضالری پارلماننینگ بوگون عمومی ییغینیده روسیهنینگ بو حرکتی افغانستان ایچکی ایشلریگه توغریدن – توغری ارهلهشیش دیگنلر.
نمایندهلر مجلسینینگ اعضالریدن بیری صالح محمد صالح افغانستان ییریک دولتلر اوروش میدانیگه ایلنمس لیگی بارهسیده تاکیدلهگن.
عین حالده، قندهارنینگ پارلماندهگی وکیلی محمد نعمیم لالی حمیدزی، روسیه آچیق روشده قوراللی طالبلردن اوز حمایتینی اعلان قیلگن دیگن. او، بو توغریده حکومت رهبرلری جیم تورمسلیک لرینی طلب قیلگن.
نمایندهلر مجلس اعضالریدن شینکی کروخیل، جناب کابلوفنینگ مذکور اظهاراتی مجلس اعضالرینینگ مسوولیتسیز سوزلریدن کیلیب چیققهدی دیگن.
پارلمان اعضالریدن هیچ بیرینینگ نامینی تیلگه آلمهگن خانم کروخیل، نمایندهلرنینگ مسوولیتسیز اظهاراتی خارجیلرنینگ افغانستان ایچکی ایشلریگه ارهلشیشی اوچون زمینه یرهتگن دیگن. اونینگ سوزلریگه کوره، مجلس اعضالرینینگ بو قبیل سوزلری باشقه مملکتلرنینگ افغانستانگه بولگن ایشانچیگه هم سلبی تاثیر قویشی ممکن.
شونینگدیک پارلمان رییسی عبدالرؤوف ابراهیمی، افغانستان اوچون روسیهنینگ نمایندهسی سوزلریگه مملکت تشقی ایشلر وزیرلیگی جیم توریشی ایریم سوراقلرنی ذهنلرده توغردیره دی دیگن.
کابلوفنینگ اظهاراتیگه سکوت سقلهگن تشقی ایشلر وزیرلیگیگه قرهمی، افغانستان ملی مدافعه وزیرلیگی روسیه بیلن قوراللی طالبلرنینگ علاقه قوریشی نا ممکن دیگن.
سونگی وقتلرده افغانستان اینیقسه شمالی ولایتلرده داعش گروهینینگ کوچلهنیشی (منفعتی بیر بولگن) دولتلرنینگ جدی خواطریگه سبب بولدی. آخیرگی وقتلرده روسیه دولتی تاجیکستانده ایریم حربی قرارگاهلرنی تاسیس قلیشگه اولگوردی.
