هند باش وزیری نرندا مودی افغانستان ملی مجلس ینگی بناسی آچیش مناسبتی بیلن اوتکزیلگن ییغینده قیلگن چیقشده، افغانستان ملی کوچلری ترورچی گروهلرگه قرشی کورهشیش اوچون قربانلیک بیرگنلیگی سبب مذکور قربانلر خانهدانلریگه 500 تحصیلی بورس بیریلیشیدن سوز بیرگن.
شونینگدیک جناب مودی افغانستان ملی مجلس بناسینینگ ایشی اوز پایانیگه ییتگنلیگیدن خرسندلیک بیلدیریب، بو بنا هند و افغانستان دوستلیگی ایلدیزی اوزاق ایکنلیگینی انگلتهدی دیگن.
اوشبو مناسبت بیلن اوتکزیلگن ییغینده چیقیش قیلیب سوزلهگن افغانستان جمهور رییسی محمداشرف غنی، هند سونگی ییللرده حکومتگه کورستگن همکارلیکلری اینیقسه هرات سلما توغانی و ملی مجلس ینگی بناسی اوچون اوز منتدارلیگینی اعلان قیلدی. جمهور رییس، هندوستان بیزنینگ اوزاق ییللیک دوستیمیز و بو اورتاقلیگیمیز دوام ایته دییه بیلدیرگن.
افغانستان ملی مجلس ینگی بناسینینگ توپ تاشی 2005- ییلده سابق جمهور رییس حامدکرزی زمانیده قوییلگن ایدی. پارلمان و سنا مجلسی اوچون قوریلگن اوشبو زمانوی بنا 15 جریب ییرنی قمرهب آلگن.
حاضر ملی مجلسنینگ سالنیده 249 کرستی موجود، اما اوشبو سالن 360 کرسی قابلیتیگه ایگه. شونینگدیک سنا مجلسی سالنیده هم 102 کرسی قوریلگن بو سالن هم ایسه 120 کرسی اورنهتیلیش اوچون مولجلنگن.
افغانستان ملی کینگش بناسی قوریلیشی اوچون 220 میلیون اقش دالری صرفلنگن. هندوستان اوتگن اون ییل جریانیده اوشبو ییریک لایحهدن تشقری حکومتگه مالی، تخنیکی و عملیاتی ساحهلرگه هم اولکن یاردملر کورسهتیب کیلگن.
