بغلان ولایتی دندغوری طالب‌لری‌نینگ آگاه‌لنتیریشیچه، توی مراسم‌لریده «موسیقی» اورنیده طالب‌لرنینگ تبلیغی و ترانه‌لری پخش ایتیلمه‌گن صورتده، قتیق شکلده جزالنیشی ممکن.
طالب‌لر گروهی اخلاقی کمیسیونی، موسیقی قوییلیشی، ضبظ ایتیلیشی و چلینیشی‌نی جرم بیلیب ایتیشیچه، بوندن کیین، دندغوری یشاوچیلری‌نینگ توی مراسم‌لریده قوشیق آوازی ایشیتیلسه، جدی حرکت‌گه روپه‌ره بوله‌دی.
دندغوری یشاوچیلریدن بیری خال‌مراد، سلام‌وطندار بیلن تلیفون علاقه قوریب ایتیشیچه، کوتیش‌گه قرشی بیر قطار کیشی‌لر طالب‌لرنینگ ینگی قانون‌نی خوش قرشی‌لب و اوندن حمایه قیله‌دی. بیراق خال‌مرادگه کوره، دندغوری یشاوچیلریدن کوپینچه‌سی طالب‌لر و کیین مه کیین صادر ایتیله‌دیگن قانون و حکم‌لریدن قینه‌لیب قالگن؛ اولر مذکور گروه‌نینگ ینگی قانون‌نی قاره‌لب و اونی نادانلیک دیب بیله‌دی.
دندغوری طالب‌لری شونده‌ی بیر قانون‌نی فاتحه مراسمی توغری‌سیده چیقارگن. ایتیلیشیچه، حاضر مذکور تومن‌ده، توی مراسم‌لری، مسجدلر و باشقه ییغین‌لرده، یالغیز طالب‌لرنینگ تبلیغ‌لری ایشیتیلیب و خلق‌دن افغانستان دولتی‌گه قرشی جهاد و اوروش‌گه قوشیلیش‌لرینی سوره‌گن.
ایتیلیشیچه، دندغوری‌ده اوتکزیله‌دیگن هرقنه توی مراسمی، فاتحه مراسمی و باشقه ییغین‌لرده، طالب‌لر گروهی کوتیلمه‌گن مهمان صفتیده حضور کیلتیریب و خلق توپله‌میدن ایش آلیب، مقصد و مرام‌لرینی ییتیشتیره‌دی.
