غزنی والیسی محمدامان حمیم‌نینگ سلام‌وطندارگه ایتیشیچه، کشفی کوچلر معلوماتی اساسیده، پاکستان جنرال‌لریدن حامد و ملاسعد ناملی ایکی کیشی و افغان طالب‌لر قومندانلریدن بیرقطاری، غزنی اطرافیده‌گی ولایت‌لردن توپله‌نیب، غزنی‌ده دولتی کوچلر برابریده‌گی اوروشنی رهبرلیک قیله‌دیلر. اونینگ کوپه‌یتیریشیچه، طالب جنگری‌لری و تُرک و اوزبیک گروه‌لر، پاکستان‌لیک جنرال‌لرنینگ بویروغی و ریجه‌سی بولمه‌گن صورتده، هیچ بیر ایش قیلمه‌یدی.
بیراق، غزنی والیسی‌نینگ خلق‌گه ایشانچ بیریشیچه، بو ولایت هیچ قچان سقوط قیلمه‌یدی و امنیتی کوچلر طالب جنگری‌لری‌نینگ برچه هجومی‌نی دفع ایته‌دی.
باشقه تاماندن، غزنی والیسی اورین باسری محمدعلی احمدی‌نینگ ایتیشیچه، اوروش طریقه‌سی اوزگرگن و شهر اطرافیده‌گی پسته‌لر و هوایی کوچلر هجومی نتیجه‌سیده، 113 طالب هلاک بولیب یره‌لنگن و اوشبو گروه اعضالریدن بیرقطاری توتقونگه آلینگن.
شهرده حاضر خلق حیاتی عادی حالت‌گه قیتگن، بازارلر و دکان‌لر قیته‌دن آچیلیب کوچه‌لرده خلق کیلیم و کیتیمی کوپیگن. غزنی یشاوچیلریدن سیف‌الله و رحیم‌الله‌نینگ سلام‌وطندارگه ایتیشیچه، اوتکن کونلرده شهر وضعیتی اونچه‌لیک یخشی ایمس ایکن و خلق خواطر بیلن حیات کیچیرردی؛ بیراق حاضر شرایط اوزگرگن و خلق بازارلرده کیلیب و کیتیب تینچ‌لیک حس قیله‌دی.
