هلمند امنیتی رسمی‌لری، مذکور ولایت نورزاد تومنی‌ده چیگره کوچلریدن 22 ته‌سی طالب‌لر آرقه‌لی هلاک ایتیلگنی‌دن خبر بیره‌دی.
امنیتی رسمی‌لردن بیری آتی فاش ایتیلیشینی ایستمه‌ی سلام‌وطندارگه ایتیشیچه، طالب‌لر مذکور تومن‌ده چیگره کوچلری ایکی پوسته‌سی اوستیگه هجوم اویوشتیریب، مذکور عسکرلرنی اولدیرگن. اونینگ کوپه‌یتیریشیچه، هجوم نتیجه‌سیده ایکی پوسته بوتونله‌ی اورته‌دن کیتگن.
اوشبو امنیتی ملازم‌گه کوره، مذکور کوچلردن 7 ته‌سی یره‌لنگن و باشقه 6 ته‌سی حاضرگچه درک سیز دیر.
شونینگ‌دیک محل یشاوچیلری‌نینگ ایتیشیچه، طالب‌لر عصری حربی جهاز بیلن اوشبو پوسته‌لر اوستیگه هجوم اویوشتیرگن.
چیگره کوچلری 604 زونی‌نینگ سوزلاوچیسی حزل‌الله خاموش، اوشبو خبرنی تأیید قیلگن، بیراق ایتیشیچه، مذکور منطقه بیلن مرکز علاقه‌سی کیسیلگنی باعث، باشقه معلومات قولگه کیریته‌آلمه‌گن‌لر.
جناب خاموش‌نینگ کوپه‌یتیریشیچه، مذکور ولایت حربی کینگش قراری‌گه اساس، چیگره کوچلریدن کوپینچه‌سی اوشبو ولایت‌نی سنگین، نورزاد و باشقه بیرقطار تومن‌لری‌گه یوباریلگن.
شونینگ‌دیک هلمند حاکمی سوزلاوچیسی عمر زواک‌نینگ، مذکور پوسته‌لر اوستیگه طالب‌لر تامانیدن اویوشتیریلگن هجوم توغری‌سیده ایتیشیچه، منطقه‌ده امنیتی کوچلر بیلن طالب‌لر اورته‌سیده توقنه‌شوو یوزبیرگن و ایکی تامان هم تلفات کورگن.
بیراق، قورال‌لی طالب‌لر سوزلاوچی‌لریدن بیری قاری یوسف احمدی‌نینگ ایتیشیچه، مذکور هجوم نتیجه‌سیده، چیگره کوچلریدن 31 ته‌سی هلاک بولگن و حربی جهازلری غنیمت‌گه توشگن. اونینگ کوپه‌یتیریشیچه، اوشبو کوچلردن باشقه 5 ته‌سی توتقونگه آلینگن.
اوشبو هجوم شونده‌ی حالده یوز بیره‌دی کیم، انچه پیت آلدین هلمند والیسی میرزاخان رحیمی، مذکور ولایت‌ده امنیتی وضعیت یخشی‌لنگنینی ایتکن ایدی.
